कोरोना भाइरसको संक्रमण फैलिन नदिन सरकारले गरेको बन्दाबन्दी (लकडाउन) का कारण रोकिएको एसइइ परीक्षाको विकल्पमा शिक्षा मन्त्रालयले गरेको तयारी बारे संसदमा प्रश्न उठेको छ।

मंगलबार बसेको राष्ट्रिय सभा बैठकको शून्य समयमा सांसद डा विमला राइ पौड्यालले परीक्षा रोकिएका कारण विद्यार्थी गहिरो मानसिक समस्या (डिप्रेसन) मा जान लागेको भन्दै चिन्ता जनाएकी हुन्।

‘एसइइ परीक्षा र ११ कक्षाको परीक्षा रोकिएर बच्चाहरु डिप्रेसनमा जान थाथिसकेका छन, शिक्षा मन्त्रालय के गर्दैछ ? यसको विकल्पमा के ल्याउदैछ प्लान ? म जान्न चाहन्छु’ उनले भनिन्।  

सोमवार राष्ट्रका नाममा सम्वोधन गर्दै प्रधानमन्त्री केपी शर्मा ओलीले रोकिएको एसइइ परीक्षाको बारेमा शिक्षा मन्त्रालयले गृहकार्य गरिरहेको बताएका थिए । 

चैतमा एसइइ परीक्षा शुरु हुनुपर्नेमा सरकारले अन्तिम समयमा आएर स्थगित गरेकाे थियो। त्यो बेला अनिश्चितकालका लागि रोकिएको परीक्षाको नयाँ तालिका प्रकाशित भएको छैन।