बजेट परिणाममुखी भन्दा बढी प्रचारमुखी - काँग्रेस
प्रमुख प्रतिपक्षी दल नेपाली काँग्रेसले नेपाल सरकारद्वारा आर्थिक वर्ष २०७७/७८ को लागि प्रस्तुत बजेट परिणाममुखीभन्दा प्रचारमुखी रहेको भनी टिप्पणी गरेको छ ।

बजेटमा जनतालाई आश्वासन दिने तर कार्यान्वयन नहुने खालका कार्यक्रमलाई जोड दिइएको काँग्रेसको भनाइ छ । काँग्रेस संसदीय दलको आज बसेको बैठकले लकडाउनका कारण सम्पूर्ण उद्योग, कलकारखाना, पर्यटन, शैक्षिक संस्था, बैंक वित्तियलगायत क्षेत्र ठप्प भएको अवस्थामा पनि मुलुकको अर्थतन्त्रलाई माथि उठाउने र तत्काल कार्यान्वयन हुने खालका कार्यक्रमहरुलाई बजेटमा प्राथमिकता नदिएको निष्कर्ष निकालेको छ ।

कोरोना भाइरस महामारीको प्रकोपबाट पीडित निजी क्षेत्रका उद्योग व्यवसायका साथै त्यसका कर्मचारी र श्रमिक वर्गहरुलाई सम्बोधन हुने ठोस कार्ययोजनालाई बजेटले सम्बोधन नगरेको काँग्रेसको आरोप लगाएको छ ।

बैठकले कोरोनाको प्रभावबाट भविष्यमा हुने रोजगारीको सङ्कटलाई सामना गर्न सरकारले उपयुक्त र पर्याप्त रोजगारी सिर्जना गरी आर्थिक क्रियाकलापलाई गतिशील बनाउने योजनालाई बजेटले प्राथमिकतामा नराखेको भनी टिप्पणी गरेको छ ।

काँग्रेस प्रमुख सचेतक बालकृष्ण खाँणले अहिलेको विषम र असामान्य अवस्थामा पनि सरकारले विगतमा झै सामान्य बजेट ल्याएको बताउँदै राजश्वको सङ्कुचन भइरहेको र भविष्यमा अझै भइरहने अवस्थामा सरकारले ठूलो विदेशी र आन्तरिक ऋणको आधारमा बनाएको बजेट कार्यान्वयन गर्न कठिन हुने बताए ।

काँग्रेस सभापति एवं संसदीय दलका नेता शेरबहादुर देउवाको अध्यक्षतामा बसेको बैठकमा विज्ञका रुपमा पूर्वअर्थमन्त्री डा रामशरण महत, राष्ट्रिय योजना आयोगका पूर्वउपाध्यक्षहरु डा जगदिशचन्द्र पोखरेल, डा गोविन्दराज पोखरेल र डा स्वर्णीम वाग्ले तथा अर्थविद् डा विश्व पौडेलले बजेटका विविध पक्षको समीक्षा गर्दै कमी, कमजोरी बारेमा जानकारी गराएका थिए ।

विदेशमा अलपत्र परेकामध्ये दैनिक ३५ सयको उद्धार गर्ने तयारीमा सरकार

कोरोना रोकथाम तथा नियन्त्रण उच्चस्तरीय समन्वय समितिले एक सातापछि विदेशमा अलपत्र नेपालीहरूको प्राथमिकताका आधारमा उद्धार गर्ने निर्णय गरेको छ ।

बिहीवार सिंहदरबारस्थित प्रधानमन्त्री कार्यालयमा बसेको समितिको बैठकले प्राथमिकताका आधारमा नेपाल आउन चाहनेहरूको विवरण तयार गर्न परराष्ट्र मन्त्रालयलाई आग्रहसमेत गरेको छ ।

बैठकपछि सकिएपछि समितिका एक सदस्यले लोकान्तरसँग कुरा गर्दै भने, ‘सरकारी र निजी कम्पनीका सबै जहाज उडाएर दैनिक ३ हजारदेखि ३५ सय सम्मको संख्यामा नेपालीहरूको उद्धार गर्ने कार्यविधि बनाइएको छ ।’

उनका अनुसार उक्त कार्यविधिमा आएका सुझावहरू सहित परिमार्जन गरेर लागू गरिनेछ । त्यसका लागि मुख्यसचिव नेतृत्वको कार्यदललाई जिम्मा दिइने उनले बताए ।

उक्त कार्यविधिमा विदेशबाट आएकालाई २ सातासम्म काठमाडौँका होटेलहरूमा राखिने उल्लेख छ । होटेलमा बस्दाको खर्च र खानाको मूल्य भने सरकारले तोक्नेछ । २ साता काठमाडौँमा बसिसकेपछि उनीहरूलाई आफ्नो घर पठाइनेछ ।

विदेशबाट आउनेहरूले आफ्नो आर्थिक क्षमताका आधारमा कुन होटेलमा बस्ने भन्ने आफैं निर्णय गर्न पाउनेछन् ।

१७० संक्रमित बढेसँगै कुल संख्या १ हजार २ सय १२ पुग्यो, ६ जनाको मृत्यु

नेपालमा कोरोनाभाइरस (कोभिड- १९) संक्रमितको संख्या १ हजार २ सय १२ पुगेको छ ।

पछिल्लोपटक १७० जनामा कोरोना संक्रमण पुष्टि भएको जानकारी स्वास्थ्य तथा जनसंख्या मन्त्रालयले शुक्रवार पत्रकार सम्मेलन गरी जानकारी दिएको छ ।

स्वास्थ्य मन्त्रालयका प्रवक्ता डा. विकास देवकोटाले दिएको जानकारीअनुसार सबैभन्दा बढी रौतहटमा थप ५६ जनामा कोरोना संक्रमण पुष्टि भएको छ ।

यसतै कपिलवस्तुमा ५१ र झापामा २८ जनामा संक्रमण पुष्टि भएको जानकारी प्रवक्ता देवकोटाले दिए ।