कोरोना भाइरस संक्रमणको महामारीसँगै जारी लकडाउनमा परेका अप्ठ्यारोमा परेका विद्यार्थीलाई नेविसंघ नेता रमेश कुँवरले सघाउँदै आएका छन् ।

अछाम जिल्ला स्थायी ठेगाना भई काठमाडौं उपत्यकामा अलपत्र परेका करीब २०० भन्दा बढी विद्यार्थी र मजदुरलाई खाद्यान्न वितरण गरिएको नेता कुँवरले बताए ।

समाजसेवी व्यक्तित्व राजेन्द्र शाहको सहयोगमा नेता कुँवरले समन्वय गर्दै विद्यार्थी र मजदुरलाई राहत वितरण गरिरहेका छन् । ‘समस्यामा परेका विद्यार्थीलाई खाद्यान्न वितरण र नगद राहत दिने तथा अछाम फर्किन चाहनेलाई यातायातको व्यवस्था मिलाइदिन समन्वय गर्ने गरिएको छ,’ कुँवरले भने ।

लकडाउन हुनुभन्दा केही दिनअघि नेता कुँवरको काठमाडौंको गौशालास्थित मातृभूमि सेवा आश्रयमका अनाथ बालबालिकालाई माक्स र साबुन समेत वितरण गरेका थिए । लकडाउनपछि कीर्तिपुर, वानेश्वर, लैनचौर, कोटेश्वर, महादेवस्थान, मैतीदेवी, ग्वार्को लगायतका क्षेत्रमा घरदैलोमै पुगेर सहयोग गर्ने गरिएको नेता कुँवरले बताए ।

कुँवरले विद्यार्थीको डेरामै पुगेर चाबहिल, स्वयम्भू, कीर्तिपुर, वानेश्वर, कोटेश्वर, सिनामंगल, लैनचौर, धापाखेल क्षेत्रमा बस्ने करीब ५० जना विद्यार्थीलाई आर्थिक वितरणमा सहयोग र समन्वय गरेका छन् । काठमाडौंबाट सुदूरपश्चिमका विभिन्न जिल्लामा जान चाहने विद्यार्थीलाई यातायात व्यवस्थापनमा समन्वय गरेर मास्क र स्यानिटाइजर वितरण गर्ने गरिएको कुँवरले बताए ।

‘लकडाउनको विषम परिस्थितिमा समस्यामा परेका विद्यार्थी र मजदुरहरूलाई सहयोग गर्न पाउँदा खुशी छु,’ नेता कुँवरले भने, ‘यो बेला अरुको विरोध मात्रै गरेर बस्नुभन्दा युवाहरूले रचनात्मक र सामाजिक सेवामा लाग्नुपर्छ ।’ विद्यार्थी नेता एवं सामाजिक आध्यात्मिक अभियान्ता कुँवर ललितपुरको पाटन संयुक्त क्याम्पसमा एमएस्सी भौतिक शास्त्र दोस्रो सेमिस्टरमा अध्ययनरत छन् । आगामी दिनमा पनि समस्यामा रहेका विद्यार्थीलाई सहयोग गर्ने कार्यलाई निरन्तरता दिइने नेता कुँवरले बताए ।