२ नम्बर प्रदेशको प्रदेश सभामा कार्यरत ५ जना मर्यादापालकमा कोरोना भाइरस संक्रमण पुष्टि भएको छ ।

जिल्ला प्रहरी कार्यालय धनुषाका प्रवक्ता प्रहरी नायव उपरीक्षक (डीएसपी) रामेश्वर कार्कीले मर्यादापालकमा कोरोना देखिएको पुष्टि गरे ।

‘जेठ १५ गते प्रदेश सभामा कार्यरत रहेका मर्यादापालकको स्वाब संकलन गरेर परीक्षणका लागि पठाइएकोमा ५ जनाको कोरोना पोजेटिभ आएको छ,’ डीएसपी कार्कीले भने, ‘उहाँहरू सबै जना प्रदेश सभामा नै डुयुटी गर्नुहुन्थ्यो ।’

मर्यादापालकमा कोरोना देखिएपछि बिहीवार बोलाइएको प्रदेशसभा बैठक स्थगित गरिएको प्रदेशसभा सचिवालयका सचिव रञ्जितकुमार यादवले बताए । ‘बिहीवार १ बजे बोलाइएको प्रदेश सभाको बैठक स्थगित गरेका छौं,’ सचिव यादवले भने, ‘अब भोलि शुक्रवार १ बजे बोलाउने बैठकलाई के गर्ने भन्ने निर्णय गर्न सभामुखज्यूले बैठक डाक्नुभएको छ ।’

बुधवार मात्रै प्रदेशसभा बैठक बसेको थियो । संक्रमित मर्यादापालक बुधवारको बैठकमा पनि उपस्थित भएका थिए । ५ जना मर्यादापालकमा कोरोना पाइएपछि सांसद, सचिवालयका कर्मचारी, अन्य मर्यादापालकसहित सुरक्षाकर्मीमा त्रास बढेको छ । 

धनुषाका ९ जना प्रहरीमा कोरोना

यससँगै धनुषा जिल्लामा ९ जना प्रहरीमा कोरोना संक्रमण पाइएको छ । डीएसपी कार्कीका अनुसार यसअघि धनुषा जिल्ला अदालतको १ नम्बर इजलाशका न्यायाधीशको व्यक्तिगत सुरक्षा गार्डका रुपमा खटिएका पीएसओमा समेत कोरोना पोजेटिभ देखिएको थियो ।

अदालतका न्यायाधीश घर बिदामा गएका कारण उनलाई त्यहाँबाट झिकाएर गोपाल धर्मशालामा सञ्चालित क्वारेन्टीनमा खटाइएको थियो । क्वारेन्टीनमा नै उनी संक्रमित भएको डीएसपी कार्कीले बताए । 

धनुषाको नगराइन नगरपालिकाको गंगुलीस्थित प्रादेशिक क्वारेन्टीनमा खटिएका इलाका प्रहरी कार्यालय फुलगामाका २ जना प्रहरीमा कोरोना पोजेटिभ पाइएको थियो । जनकपुरको हनुमाननगर चौकीमा कार्यरत रहेका १ जना प्रहरीमा समेत कोरोना पाइएको थियो ।