पश्चिम रुकुमको चौरजहारीमा भएको घटनाका विषयमा मानवअधिकारकर्मी तथा पत्रकारहरूको टोलीले प्रारम्भिक जानकारी लिन शुरू गरेको छ ।

मानवअधिकार तथा शान्ति समाजको नेतृत्वमा मानवअधिकारकर्मी र पत्रकारको टोली शुक्रवार रुकुम र जाजरकोटको स्थलगत अध्ययन अनुगमनमा निस्केको हो ।

टोलीले शनिवार जिल्ला प्रहरी कार्यालय पश्चिम रुकुमका  प्रहरी प्रमुख डीएसपी ठगबहादुर केसीसँग घटनाबारे जानकारी लिएको छ ।

डीएसपी केसीले चौरजहारी घटनाका आरोपी २५ जनालाई हिरासतमा लिएर अनुसन्धान अघि बढाइएको जानकारी दिए । अझै २ जना फरार रहेको र उनीहरूको खोजी भइरहेको समेत टोलीलाई जानकारी गराए । 

घटना निकै संवेदनशील भएकाले यससँग सम्बन्धित सबै पक्ष र निकायसँग भेट गरी गहन अध्ययन र अनुगमन पश्चात नागरिक स्तरको प्रतिवेदन प्रस्तुत गरिने मानवअधिकार तथा शान्ति समाजका केन्द्रीय उपसभापति गोविन्द खनालले जानकारी दिए ।

टोलीले हिरासतमा रहेका आरोपीलाई समेत भेटघाट गरेको उनले बताए । टोलीमा संविधानसभा सदस्य विनोद पहाडी, वरिष्ठ पत्रकार बालकृष्ण चापागाईं, अधिवक्ता शिव गौडेल, पत्रकारहरू माधव नेपाल, विनोद परियार छन् ।

टोलीले शनिवार नै रुकुम पश्चिमका प्रमुख जिल्ला अधिकारी, जनप्रतिनिधि र स्थानीय नागरिक समाजसँग समेत भेटघाट गरेको थियो । टोली घटनास्थल चौरजहारी–८ र पीडित पक्षसँग भेट्न जाजरकोट जाने तयारीमा रहेको वरिष्ठ पत्रकार बालकृष्ण चापागाईंले जानकारी दिए ।