कोरोना भाइरस रोकथामका लागि गरिएको लकडाउनका  सुत्केरीलाई पोषणको अभाव हुन नदिन बुटवल उपहानगरपालिकाले गर्भवती तथा सुत्केरीलाई पोषिला खानेकुरा वितरण दिन सुरु गरेको छ।

उनीहरुलाई क्याल्सियम आइरन, दशमुलारिष्ट आयुर्वेदिक औषधि, घ्यू, मेथी, ज्वानो लगायत पौष्टिक आहारासँगै चामल उपलब्ध गराइएको छ।

लकडाउनमा नियमित स्वास्थ्य सेवाका अतिरिक्त बुटवलले विपन्न समुदायका गर्भवती र सुत्केरी महिलालाई घरमै पुगेर पोषण सामग्री प्रदान गरेको हो। बुटवलले आव ०७५/७६ देखि उपप्रमुख गर्भवती तथा सुत्केरी भेटघाट कार्यक्रम सुरु गरेको थियो। 

महामारीका बेलामा जनस्वास्थ्यको हटलाइन सेवासँगै सबै वडाहरुलाई लक्षित गरेर विभिन्न ठाउँमा ज्वराे क्लिनिकसमेत सञ्चालनमा छन्। मातृशिशु, महिला, गर्भवती, बालबालिकादेखि हरेक उमेर समूहलाई लक्षित गरी विश्वसनीय, जवाफदेहीपूर्ण र प्रभावकारी सेवा उपलब्ध गराउन संवेदनशील भएर लागिएको उपमहानगरलिकाका प्रमुख शिवराज सुवेदीले बताए। 

महामारीविरुद्ध अभियानसँगै अहिले बुटवलले स्वास्थ्य सुरक्षाप्रवन्धसहित भौतिक दूरी कायम गरेर नगरका अतिविपन्न समुदायका सुत्केरी तथा गर्भवती महिलालाई पोषण सामग्री प्रदान गरिरहेको उपप्रमुख गुमादेवी गुमादेवी आचार्यले जानकारी दिइन्।

लकडाउनको अवधिमा पनि ८१ जना आर्थिक रुपमा विपन्न तथा श्रमिक सुत्केरीको घरमै पुगेर सेवा दिइएको छ। त्यसैगरी स्वास्थ्यकर्मीहरुबाट स्वास्थ्य चेकजाँच र परामर्शसमेत दिइएको उपप्रमुख आचार्यले बताइन्।  

गर्भवती र प्रसूति अवस्थाका साथै बच्चा दुई वर्षको हुँदासम्म दूध, घ्यू, मासु, अण्डा, सागलगायत पोषिला खानेकुरा खानुपर्ने सन्देश पु-याउन बुटवलले 'उपप्रमुख सुत्केरी तथा गर्भवती भेटघाट कार्यक्रम' सञ्चालन गरेको थियो। गर्भवती र सुत्केरीका परिवारका सदस्यलाई पोषिला खानेकुरा खुवाउन, जोखिमयुक्त काममा नलगाउन र तनावमुक्त वातावरण बनाउन सहयोगका लागि परामर्शसमेत दिइएको छ। 

बुटवलका विभिन्न सहरी स्वास्थ्य केन्द्रहरुमार्फत आधुनिक ल्याब सेवासहितको प्राथमिक स्वास्थ्य सेवा सञ्चालनमा छन्। यस्ता सेवा सञ्चालन भएदेखि नै बुटवलमा सरकारी स्तरका स्वास्थ्य संस्थामा सेवाग्राहीको आकर्षण बढेको थियो।

नगरका स्वास्थ्य संस्थाहरुबाट ४० वर्षभन्दा माथिका नागरिकहरुलाई निःशुल्क सुगरको जाँच भइरहेको छ। यसअन्र्तगत करिब चार हजार जनाले यो सेवा लिइसकेको उपमहानगरको तथ्यांकमा छ । 

८० वर्षमाथिका ज्येष्ठ नागरिकलाई घरदैलोमै चौमासिक रुपमा पुगेर स्वास्थ्य चेकजाँच र निःशुल्क औषधी उपलब्ध गराउने स्थानीय तहमा बुटवल अग्रणी मानिन्छ। ‘नगरप्रमुख ज्येष्ठ नागरिक घरदैलो निःशुल्क स्वास्थ्य परीक्षण’ शीर्षकमा सुरु भएको यो कार्यक्रमअन्तर्गत दुई हजारभन्दा धेरै ज्येष्ठ नागरिकले सेवा लिएको उपमहानगरका शिक्षा तथा जनसंख्या महाशाखा प्रमुख मित्रमणि खनालले जानकारी दिए ।