सत्तासिन नेपाल कम्युनिस्ट पार्टी (नेकपा) को सचिवालय बैठक आइतबार बस्ने भएको छ।

नेकपा स्रोतका अनुसार बैठक आइतबार साँझ ४ बजेका लागि बोलाइएको छ। 

बैठक अमेरिकी मिलिनियम च्यालेञ्ज कम्प्याक्ट (एमसीसी) सम्झौतालाई लिएर चुलिएको विवाद टुंग्याउने विषयमा केन्द्रित रहनेछ।

सरकारको नीति तथा कार्यक्रम र बजेटमा एमसीसी समावेश गरेपछि पछिल्लो समय नेकपाका केही नेताहरुले आपत्ति जनाएका थिए।

यो अवस्थामा आइतबारको नेकपा सचिवालयमा अर्थमन्त्री डा. युवराज खतिवडा र एमसीसीका कार्यदल सदस्यहरुलाई पनि बोलाइएको छ। 
     
नेकपाले एमसीसीका सन्दर्भमा नेकपाका वरिष्ठ नेता झलनाथ खनालको संयोजकत्वमा अध्ययन कार्यदल गठन गरेको थियो। संयोजक खनालसहित कार्यदलका सदस्य भीम रावल विद्यमान स्थितिमै एमसीसी संसदबाट अनुमोदन गर्न नहुने पक्षमा छन्।

तर कार्यदलका अर्का सदस्य एवं परराष्ट्रमन्त्री प्रदीप ज्ञवाली भने एमसीसी हालकै अवस्थामा अनुमोदन हुँदा मुलुकको सार्वभौमसत्ता, स्वतन्त्रता र राष्ट्रिय हितमा आँच नआउने बताउँदै आएका छन्।