सुदूरपश्चिम प्रदेशका कैलाली, डोटी र दार्चुला जिल्लामा आजबाट कृषि ज्ञान केन्द्रका कार्यालय स्थापना गरी सेवा विस्तार गरिएको छ।

यसैगरी कैलाली, डोटी, दार्चुला र अछाम जिल्लामा भेटेरिनरी अस्पताल तथा पशु सेवा विज्ञ केन्द्रका कार्यालय पनि स्थापना गरी सेवा विस्तार भएको छ। 

सङ्घीयता कार्यान्वयनका क्रममा नेपाल सरकारले दिएको खाकाअनुसार प्रदेशको कञ्चनपुर, डडेल्धुरा, बैतडी, अछाम, बझाङ र बाजुरा जिल्लामा कृषि ज्ञान केन्द्र र बझाङ, बाजुरा, बैतडी, डडेल्धुरा र कञ्चनपुर जिल्लामा भेटेरिनरी अस्पताल तथा पशु सेवा विज्ञ केन्द्रका कार्यालय स्थापन भई सेवा प्रवाह भइरहेको मा थप जिल्लामा यी कार्यालय स्थापना गरिएको हो।

आजदेखि थप जिल्लामा कार्यालय स्थापना भएसँगै प्रदेशका सबै जिल्लामा कृषि र भेटेरिनरी अस्पताल तथा पशु सेवा विज्ञ केन्द्रको सेवा विस्तार भएको भूमि व्यवस्था, कृषि तथा सहकारी मन्त्रालयले जनाएको छ। 

मन्त्रालयको सिफारिसमा प्रदेश सरकारले गरेको निर्णयबमोजिम थप जिल्लामा कृषि र भेटेरिनरी कार्यालय स्थापना गरी सेवा विस्तार गरिएको मन्त्रालयका प्रवक्ता खगेन्द्रप्रसाद शर्माले बताए। ‘‘अर्को व्यवस्था नभएसम्म अहिले यो अस्थायी व्यवस्था हो,’ उनले भने, ‘स्थायी सङ्गठन संरचना बनाउनका लागि प्रदेश सरकारको पहलमा अध्ययन पनि भइरहेको छ।’

नेपाल प्रशासनिक प्रशिक्षण प्रतिष्ठान (स्टाफ कलेज) ले सुदूरपश्चिम प्रदेशको सङ्गठन संरचनाबारे हाल अध्ययन गरिरहेको जनाइएको छ। एक जिल्लाबाट अर्को जिल्लामा गएर सेवा लिनुपर्ने कृषकहरूको समस्यालाई मध्यनजर गरी सेवा प्रवाहलाई सहज बनाउन थप जिल्लामा यी कार्यालय स्थापना गरिएको हो।

मन्त्रालयको पशुपन्छी महाशाखाका प्रमुख डा हेमराज अवस्थीले कर्मचारीको मौजुदा दरबन्दीबाट नै नयाँ थपिएका कार्यालय सञ्चालन गरेर सेवा विस्तार गरिएको बताए।  उनले भने, ‘आर्थिक मितव्ययिताका साथै न्यूनतम् व्यवस्थापन खर्च हुने गरी कार्यालय सञ्चालनमा आउन लागेका हुन्।’

देश सङ्घीय संरचनामा जानुअघि प्रदेशका सबै नौ जिल्लामा रहेका तत्कालीन ‘जिल्ला कृषि विकास कार्यालय‘ र ‘जिल्ला पशु सेवा कार्यालय‘ र मातहतका संरचनामार्फत कृषकहरूमा सेवा प्रवाह हुँदै आएको थियो। 

सङ्घीयता पछि जिल्ला कृषि विकास कार्यालयको नाम परिवर्तन गरी कृषि ज्ञान केन्द्र र जिल्ला पशु सेवा कार्यालयको नाम परिवर्तन गरी भेटेरिनरी अस्पताल तथा पशु सेवा विज्ञ केन्द्र राखिएको छ। सङ्घीयता पछि सञ्चालनमा आएका कार्यालयको प्रारुप भने पहिलेको भन्दा फरक रहेको छ।   

कर्णाली प्रदेश सरकारले पनि यसअघि नै सबै जिल्लामा कृषि ज्ञान केन्द्र र भेटेरिनरी अस्पताल तथा पशु सेवा विज्ञ केन्द्रका कार्यालय स्थापना गरिसकेको जनाइएको छ।