प्रमुख प्रतिपक्ष दल नेकपा एमालेका उपमहासचिव प्रदीप ज्ञवालीले सत्ता गठबन्धनले नेपाल र अमेरिकाबीचको एमसीसीको कुरालाई गिजोलेर भूराजनीतिक विषय बनाएको आरोप लगाएका छन् ।

शुक्रबार संसद परिसरमा सञ्चारकर्मीसँग कुरा गर्दै ज्ञवालीले सभामुख र एमालेले कारबाही गरेका १४ जना सांसदहरूलाई कारबाही गरेर अघि बढ्ने कुरामा नेपाली कांग्रेस सकारात्मक रहेको बताए ।

उनले संसद अवरोध पार्टीको बाध्यता भएको र आफ्नो पार्टी दलीय स्वार्थका लागि नभई दलीय प्रणालीको व्यवस्थाका लागि लडिरहेको दाबी गरे ।

सत्तारूढ दलले एमसीसी सम्बन्धमा ब्लण्डर गरेको र देशले त्यसको महँगो मूल्य चुकाउनुपर्ने ज्ञवालीको भनाइ छ । 

‘एमसीसीलाई लिएर सरकारमा रहेका गठबन्धन दलहरूले जुन ब्लन्डर गरेका छन्, यसको मूल्य देशले धेरै महँगो चुकाउनुपर्छ । यो अमेरिका र नेपाल दुई देशसँग सम्बन्धित कुरा हो । तर, उहाँहरूले गिजोलेर भूराजनीतिक विषय बनाउनुभएको छ,’ ज्ञवालीले भने ।

ज्ञवालीले नेपाली कांग्रेससँग सकारात्मक रूपमा अघि बढेको बताएका छन् । प्रमुख राजनीतिक दलहरू नेकपा एमाले र नेपाली कांग्रेसले राजनीतिक स्थायित्व, बाह्य शक्तिसम्बन्धको सन्तुलन, अर्थतन्त्रमा देखा परेका संकट निवारणको लागि न्यूनतमरूपमा साझा धारणा बनाउनुपर्ने ज्ञवालीले बताए ।

‘हामीले आफ्नो पार्टीले कारबाही गरेका १४ जना सांसदहरूलाई कारबाहीको सूचना टाँस हुनुपर्छ र यसो नगर्ने सभामुखज्यू हुनुहुन्छ, उहाँले स्टेप डाउन गर्नुपर्छ भन्ने कुरा छ । त्यसो भयो भने संसदमा हामी जान पाउँछौँ, छलफलमा सहभागी हुन पाउँछौँ,’ ज्ञवालीले भने ।