नेपाल उद्योग वाणिज्य महासंघका अध्यक्ष शेखर गोल्छाले अहिलेको अर्थतन्त्रको चुनौतीले निजी क्षेत्रको मनोबल उच्च रुपमा गिराएको बताएका छन् । 

शुक्रवार ललितपुर उद्योग वाणिज्य संघको ५५ औँ स्थापना दिवसको अवसरमा बोल्दै उनले मुलुकको अर्थतन्त्रमा देखिएका चुनौतीले निजी क्षेत्रको मनोबल उच्च रुपमा गिराएको बताएका हुन् । 

‘म ३५ वर्ष भयो उद्योग वाणिज्य क्षेत्रमा लागेको तर अहिलेसम्म यस्तो समय देखेको थिएन, निजी क्षेत्रको मनोबल खस्केको अवस्था छ,’ उनले भने, ‘अर्थतन्त्रमा यसअघि भूकम्प, राजनीतिक परिवर्तन, श्रम सम्बन्ध बिग्रिएको समय र भारतीय नाकाबन्दीको समयमा विभिन्न चुनौतीहरू भोगेका थियौँ । तर, अहिलेको यो चुनौतीले निजी क्षेत्रको मनोबल गिराएको छ ।’

पछिल्लो समय मुलुकको अर्थतन्त्र अत्यन्तै चुनौतीपूर्ण अवस्थामा पुगेको उल्लेख गर्दै अध्यक्ष गोल्छाले त्यसको मुख्य कारण बजारमा तरलता अभाव नै भएको जिकिर गरे । 

उनले मुलुकको सोधनान्तर स्थिति र बैंकमा कर्जाको ब्याजदर उच्च वृद्धि तरलता अभावको कारण भएको बताए । 

‘९ महिना भइसक्यो अहिलेसम्म उद्योग वाणिज्य मन्त्री पाउन सकिएको छैन । यति ठूलो संकटको कुरा गर्दैछौं । तर, यो संकटका लागि अर्को विषयलाई समाधान गर्न समय बर्बाद गर्दैछौं,’ उनले भने, ‘समस्या समाधान नगर्ने हो भने उद्योग व्यवसायी मात्रै होइन आमजनताले समस्या भोग्छन् ।’

अध्यक्ष गोल्छाले सरकारले वस्तु आयातमा कडाइ गर्ने नीति बनाउँदा उद्योगी व्यवसायीहरूसँग छलफल गरेर मात्रै ल्याउनु पर्ने धारणा राखे । 

यस्तै गोल्छाले घर धितो राखेर विदेश गएका नेपाली युवाहरूले पठाउने रेमिटेन्स बढाउन सरकारले प्रोत्साहन दिनुपर्ने बताए । सरकारले रेमिटेन्समा प्रोत्साहन दिने व्यवस्था नगरेसम्म बैंकिङ च्यानलबाट पैसा ल्याउने कुरा सम्भव नभएको उनको भनाइ छ ।