नेकपा एकीकृत समाजवादीका अध्यक्ष माधवकुमार नेपालले आफ्नो पार्टीबाट सरकारमा सहभागी भएका मन्त्रीद्वय प्रेम आले र कृष्णकुमार श्रेष्ठ एमाले प्रवेश गर्ने कुरा अफवाह भएको बताएका छन् । पार्टीको पक्षमा जनलहर देखिएपछि भ्रम फैलाउन खप्पिसहरूले झुट फैलाएको उनले आरोप लगाए । 

अखिल नेपाल महिला संघ (समाजवादी) जिल्ला कार्यसमिति काठमाडौंले आयोजना गरेको बृहत् महिला भेला तथा प्रशिक्षण कार्यक्रममा नेता नेपालले मन्त्री आले र श्रेष्ठ एमाले प्रवेश गर्न लागेका हुन् भनेर आफूलाई सयौँ कल फोन आएको बताएका हुन् ।

‘हाम्रो पार्टीका मन्त्रीद्वय प्रेम आले र कृष्णकुमार बालकोट पुगेर एमालेका सहभागी हुने झुटो समाचारमा सम्प्रेषण भयो । त्यही कुरा बुझ्नको लागि मलाई सयौं फोन आए । त्यो भ्रम अब बाँकी छैन । हाम्रो पार्टीबारे भ्रम छर्नको लागि खप्पिसले हल्ला मच्चाउने गर्छन् ।’ 

नेता नेपालले पार्टी प्रवेशको लहर चलिरहेको दाबी गरे । ‘एमाले परित्याग गर्ने लहर चलेको छ, आज मात्र पार्टी कार्यालयमा केही नेतालाई पार्टी प्रवेश गराएर आएको छु । देशभर पार्टी प्रवेशको महाअभियान चलिरहेको छ ।’