अख्तियार दुरुपयोग अनुसन्धान आयोगले त्रिभुवन विश्वविद्यालय सेवा आयोगको कार्यालयका प्राध्यापक डा. टेकनाथ ढकालसहित ६ जना विरुद्ध आज विशेष अदालतमा मुद्दा दर्ता गरेको छ । 

सेवा आयोगको परीक्षाको परिणाम फेरबदल गरी भ्रष्टाचार गरेको भन्दै उनीहरुविरुद्ध मुद्दा दर्ता गरिएको हो । 

उत्तरपुस्तिका परीक्षण गर्ने सह-प्राध्यापक केशव घिमिरे, राजेश्वर न्यौपाने, उत्तरपुस्तिका सम्परीक्षण गर्ने प्रा.डा. टेकनाथ ढकाल, उत्तरपुस्तिका रुजु गर्ने सेवा आयोगका तत्कालीन प्रमुख परशुराम कोइराला, तत्कालीन मुख्य कार्यालय सहायक बच्चुराम पाण्डेविरुद्ध मुद्दा दर्ता गरिएको छ ।

त्रिवि सेवा आयोगबाट लिइएको विज्ञापन नं. १८/०७३/०७४ अन्तर्गतका पदहरूको स्थायी पदपूर्तिका लागि लेखा सहायक, पुस्तकालय सहायक पदको लिखित परीक्षामा परीक्षकहरूले गलत मनसायका साथ केरमेट गरी जम्मा र प्राप्तांकमा हेरफेर गरेको अनुसन्धानबाट खुलेको अख्तियारको भनाइ छ । 

हेरफेर गरेर मेरिट सूची नै फेरबदल गर्ने कार्य गरेको भन्दै उनीहरूविरुद्ध मुद्दा दर्ता गरिएको आयोगका प्रवक्ता श्यामप्रसाद भण्डारीले जारी गरेको विज्ञप्तिमा उल्लेख छ ।

अख्तियारका अनुसार गलत कार्यलाई सम्परीक्षकले सदर गरेको, रुजु गर्नेले रुजु गरी सच्याउने कार्य नगरेको भन्दै मुद्दा दर्ता गरिएको हो । उनीहरुविरुद्ध तीन महिनादेखि १ वर्षसम्म कैद र ५ हजारदेखि १० हजार रूपैयाँसम्मको माग दाबी गरी मुद्दा दर्ता गरिएको छ ।