नेकपा एमालेका अध्यक्ष केपी शर्मा ओलीले नेकपा एमालेले रातिराति पूर्वराजालाई भेट्न जाने गरेको भन्ने माधव नेपालले लगाएको आरोपप्रति कडा आपत्ति जनाएका छन् । उनले राजाको पाउमा दाम राखेर ढोग्ने मान्छे आफू नभएको टिप्पणी गरे ।

अनेरास्ववियूले शुक्रवार राजधानीमा आयोजना गरेको सभालाई सम्बोधन गर्दै ओलीले माधव नेपालको नामै नलिई दर्ता चलानीको फाँटमा निवेदन चढाएर प्रधानमन्त्री माग्न जाने व्यक्ति आफू नभएको बताएका हुन् । 

‘एउटा गठबन्धनवालाले राजासँग मिल्छ भनेको सुनेँ, कहाँ छ र राजा ? पाउमा दाम राखेर ढोग्ने मान्छे होइन केपी ओली । मेरा विद्यार्थीको पाउमा राख्न तयार छु । गाउँका मजदुर किसानको पाउमा दाम राखेर ढोग्न तयार हुन्छ । राजा महाराजालाई परिक्रमा गरीगरी दाम राख्दैन,’ ओलीले भने, ‘जनताको अभिमतबाट प्रधानमन्त्री भएको हो, दर्ता चलानी फाँटमा निवेदन चढाएर प्रधानमन्त्री माग्न जाँदैन । जेल बस्न तयार हुन्छ, प्रतिक्रियावादीको अगाडि लम्पसार हुन तयार हुँदैन ।’

गत शुक्रवार पार्टी निकट महिला संघको कार्यक्रममा नेता नेपालले ओली चुनावी साँठगाँठका लागि रातिराति निर्मल निवास धाउने गरेको आरोप लगाएका थिए ।