बाजुराको बूढीगङ्गा नगरपालिकाका–१, अम्कोटका स्थानीय  हिउँदमा  भत्किएको  घरमा बसोबास  गर्दै  आएका  भए  पनि बर्खा  लाग्ने  बेला  भएपछि  कहाँ गएर  बास  बस्ने  भन्ने  चिन्तामा देखिएका छन् ।

२०६४  सालदेखि  अहिलेसम्म पटक–पटक बाढीपहिरोको त्रासमा बस्दै आएका  सो  बस्तीका  ११५  घरपरिवार बर्खामा गाउँ छोडर चौरमा बास बस्ने र हिउँद लागेपछि सोही घरमा फर्किएर बस्ने गरेका छन् ।

गाउँमाथि र गाउँको तलबाट पहिरो जान सुरु भएपछि उनीहरू बर्खाको  समय  गाउँ  छोडेर  सुरक्षित स्थानमा त्रिपाल टाँगेर बस्दै आएका छन् ।

गाउँमाथिबाट  आएको  पहिरोका  कारण ठूलो भौतिक तथा मानवीय क्षति भोगेका अम्कोटवासीले  त्यो  पीडा  अहिलेसम्म भुल्न सकेका छैनन् ।

अहिले पनि गाउँ तलबाट पहिरो लाग्न  सुरु  भएपछि  उनीहरू  कहाँ गएर बास बस्ने भन्ने चिन्तामा छन् । साँफे–मार्तडी  लोकमार्गअन्तर्गत  पर्ने अम्कोट  सडक  बर्खाको  समयमा पहिरोका  कारण  अवरुद्ध  हुने  र हिउँदमा  त्यसलाई  फेरि  सञ्चालन गर्दै जाँदा अम्कोट बस्ती नै पहिरोको उच्च  जोखिममा  पर्ने  गरेको  हो ।

सडक सञ्चालन नगर्दा पनि समस्या छ,  सडक  सञ्चालन  गर्दा  पनि अम्कोटको बस्ती नै जोखिममा पर्ने गरेको  सडक  डिभिजन  कार्यालय अछामको  बुझाइ  छ ।

 तल  नदीले जमिन काट्दै जाने र माथिबाट पहिरो बग्न  थालेपछि  सडकलाई  तलबाट माथि लाँदै गर्दा अहिले अम्कोट बस्ती नै पहिरोको जोखिममा रहेको हो ।

बस्ती  स्थानान्तरणका  लागि अम्कोटवासीले  केही  दिन  पहिले जिल्ला प्रशासन कार्यालय बाजुराको ध्यानाकर्षण गराएका थिए ।

पूरै गाउँ जोखिममा भयो भनेर अम्कोटवासीले कैयौँ  पटक  सडक  अवरुद्ध  गर्दै आएका थिए । तर, पनि उनीहरूको त्यो पीडा कुनै निकायले बुझिदिएनन् ।

गाउँमा  हुने  खानेले  त  कतै  केही व्यवस्था  गरेर  बसे  पनि  बिहान बेलुकीको  छाक  टार्न  नै  सकस भएकाहरू भने निकै कठिन जीवन बिताइरहेका छन् । गोरखापत्र दैनिकमा खबर छ ।