सत्ता गठबन्धनको बैठकमा नेकपा (एकीकृत समाजवादी)ले पोखरा महानगरपालिकासहित ३ उपमहानगरपालिकाको नेतृत्व दाबी गरेको छ । 

रामचन्द्र पौडेल नेतृत्वको निर्वाचन तयारी र अनुगमन समितिको बैठकमा एकीकृत समाजवादीले पोखरा महानगरपालिका, इटहरी, हेटौंडा र बुटवल वा तुलसीपुरमध्ये एक उपमहानगरपालिकाको नेतृत्व र घोराही, जनकपुर र नेपालगञ्जको उपमेयर पाउनुपर्ने दाबी गरेको हो ।

पोखरा महानगरपालिकामा कांग्रेसले पनि दाबी गरिरहेको छ । एकीकृत समाजवादीले भने कांग्रेसलाई काठमाडौं, ललितपुुर र विराटनगर महानगरपालिका लिएर पोखराको नेतृत्व छाडिदिन भनेको छ ।

एकीकृत समाजवादीले एमालेबाट विद्रोह गरेर आएको र त्यसको महत्त्व र मूल्य गठबन्धनले बुझ्नुपर्ने तर्क गरेको छ । २०६३ मा माओवादी केन्द्रलाई विद्रोही शक्ति भएकै कारण ८२ सिट दिएको उदाहरण एकीकृत समाजवादीका नेताहरूले दिने गरेका छन् । 

तर, कांग्रेस र माओवादी केन्द्रका नेताहरूले भने एकीकृत समाजवादीका नेताहरूलाई अस्वभाविक दाबी नगर्न भनेका छन् ।