नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले स्थानीय तहको निर्वाचन मिति नसर्ने बताएका छन् ।

सोमवार आयोजित पत्रकार भेटघाट कार्यक्रममा उनले भने,'स्थानीय तहको निर्वाचन वैशाख ३० गते नै हुन्छ, सर्दैन । सर्ने सम्भावना कहीँकतै छैन ।'

उनले निर्वाचनमा सत्ता गठबन्धन सहमतिबाटै अघि बढ्ने बताउँदै छवटा महानगरपालिका र ११ वटा उपमहानगरपालिकामा गठबन्धनका उम्मेदवार चयन सहमति नजिक पुगेको जानकारी दिए । अध्यक्ष प्रचण्डले भने, 'छवटा महानगरमा तीनवटा काँग्रेसलाई र अन्यलाई एक/एकवटा महानगर दिने कुरा सहमति नजिक छ ।'

उनले गठबन्धनमा सहमति हुन नसके जुन दलसँग सहमति हुनसक्छ सोसँग सहमति गरेर निर्वाचनमा जान पनि सकिने बताए । 'गठबन्धनभित्र सबैको सहमति हुन नसके जो जसका बीचमा सहमति हुन्छ त्यही गर्छौं । सहमति हुँदै नभए एक्लै भिड्छौँ । यो पटक माओवादी केन्द्र एक्लै जाँदा राम्रै हुन्छ',उनले भने ।गोरखापत्र दैनिकमा खबर छ ।