नेपाली  काँग्रेसबाट  कैलाली  जिल्लामा  पालिका  प्रमुख तथा उपप्रमुख हुन खोज्ने आकाङ्क्षीको सङ्ख्या धेरै देखिएको छ ।

नेपाली काँग्रेस कैलालीले नगर तथा गाउँका कार्यसमितिमार्फत आकाङ्क्षीको नाम सङ्कलन गरेपछि सङ्ख्या धेरै बढी देखिएको जिल्ला सचिव नृप सुनारले बताए ।

हरेक नगर तथा गाउँ कार्यसमितिलाई आकाङ्क्षीको नाम सङ्कलन गरेर जिल्लालाई सिफारिस गर्न निर्देशन दिएसँगै आकाङ्क्षीको दाबी बढेको हो ।

१३ स्थानीय तह रहेको कैलालीका पाँच स्थानीय तहले आकाङ्क्षीको नाम सङ्कलन  गरिसकेका  छन्  भने  बाँकी  स्थानीय  तहको  सङ्कलन भइरहेको सचिव सुनारले बताए ।

अहिलेसम्म   धनगढी   उपमहानगरपालिकाको   प्रमुख पदका लागि सात जनाले आफ्नो दाबी पेस गरेका छन् । दाबी गर्नेमा वर्तमान नगरप्रमुख तथा नेपाली काँग्रेसका केन्द्रीय सदस्य नृपबहादुर वड, काँग्रेसका महाधिवेशन प्रतिनिधि कृष्णबहादुर महरा क्षेत्री, महाधिवेशन प्रतिनिधि हरिश खड्का, नगर सभापति यज्ञराज उपाध्याय, पूर्वजिल्ला सचिव पूर्ण कुँवर, महिला सङ्घकी नगर सभापति जागृति बोगटी र लक्ष्मीदत्त भट्टले दाबी गरेका छन् ।

यस्तै उपप्रमुखमा पुष्पा भट्ट, सुनिता राना, प्रमिला लम्साल, डम्मरी महरा र निपा चोखालले दाबी गरेका छन्  ।

 लम्कीचुहा  नगरपालिकामा  प्रमुख  पदका  लागि  १०  जना  र  उपप्रमुखमा  आठ  जनाले  उम्मेदवारी  दाबी  गरेका छन् ।

नगरप्रमुखमा अरुणकुमार चौधरी, कृष्णराज पाण्डेय,  खडानन्द  सापकोटा,  देवानन्द  जैशी,  पदमराज  शर्मा,  प्रेमबहादुर  विष्ट,  बलबहादुर  विष्ट,  विष्णुप्रसाद  ढकाल, भक्तबहादुर थापा र सुशीला शाही छन् ।

यसैगरी  उपमेयरमा  चन्द्रा  सिंह,  विजय  कार्की,  रङ्गकुमारी भट्टराई, राधिका जैशी, रीताकुमारी मुडभरी, शिवा थापा, सुमनकुमारी सन्याल र दिवा बडायकले दाबी गरेको  लम्कीचुहा  नगरपालिकाका  नगर  सभापति  इन्द्र  कुँवरले जानकारी दिए । गोरखापत्र दैनिकमा खबर छ ।