सातवटा स्थानीय तह रहेको जाजरकोटमा प्रमुख प्रतिपक्षी दल नेकपा एमालेले जिल्लाका चारवटा पालिकामा सर्वसम्मत  रूपमा  उम्मेदवार  चयन  गरेको  छ  ।

 भेरी  नगरपालिका, जुनीचाँदे, कुशे र बारेकोट गाउँपालिकामा एमालेले उम्मेदवारको टुङ्गो लगाएको हो ।

अघिल्लो  स्थानीय  तहको  निर्वाचनमा  तीनवटा  पालिकामा जित हासिल गरेको एमालेले भेरी नगरपालिकामा भने वर्तमान नगरप्रमुख चन्द्रप्रकाश घर्तीलाई नै दोहोर्‍याउने निर्णय  गरेको  छ  ।

 उक्त  पालिकामा  उपप्रमुख  सावित्रा  चन्दलाई  समेत  चयन  गरिएको  छ  ।  गठबन्धनमा  रहेका  दलबीच  तालमेलको  बहस  सुरु  भएपछि  नेकपा  एमालेले  केन्द्रीय  सदस्य  चन्द्रप्रकाश  घर्तीलाई  चुनावी  मैदानमा उतारेको हो ।

यसअघि काँग्रेसले जितेको बारेकोट गाउँपालिकामा एमालेले वीरबहादुर गिरीलाई अध्यक्ष र गीता सिंहलाई उपाध्यक्षको उम्मेदवार बनाउने टुङ्गो लगाएको छ ।

कुशे गाउँपालिकामा प्रेमप्रसाद घर्ती र टीका वली (बीसी)लाई अध्यक्ष  र  उपाध्यक्षको  उम्मेदवार  बनाउने  एमालेले  जनाएको छ ।

यस्तै, जुनीचाँदे गाउँपालिकाको अध्यक्षमा वेदबहादुर शाहीको नाम टुङ्गो लगाएको छ । नेकपा एमाले जिल्ला कमिटी अध्यक्ष खिमबहादुर शाहीले अबको केही दिनमा अन्य पालिका र वडाध्यक्षदेखि सदस्यसम्म सबैको टुङ्गो लाग्ने बताए । गोरखापत्र दैनिकमा खबर छ  ।