सिट बाँडफाँटप्रति माधव नेपालको गुनासो, भने- मनोनयन २ दिन राखिनुमा षड्यन्त्र छ

नेकपा (एकीकृत समाजवादी) पार्टीका अध्यक्ष माधवकुमार नेपालले सत्ता गठबन्धनमा सिट बाँडफाँटप्रति गुनासो व्यक्त गरेका छन् ।

नेपाल कम्युनिष्ट पार्टीको स्थापना दिवसको अवसर पारेर शनिवार काठमाडौंमा आयोजित कार्यक्रममा उनले एमालेले जितेको ठाउँमा पहिलो हक र दाबी आफ्नो हुनुपर्ने भए पनि त्यसो नभएको बताएका हुन् । 

‘जसले जुन–जुन स्थानीय तहमा जितेको छ, उसलाई त्यही दिनुपर्ने सहमति भएको थियो,’ उनले भने, ‘नेकपा एमालेले जितेको ठाउँमा पहिलो हक र दाबी हाम्रो लाग्नुपर्छ । तर, सबैको आकांक्षा बढ्दो रहेछ ।’

उनले कांग्रेसमा कतिपय नेताहरू गठबन्धन कायम गर्नुपर्छ भनेर लचिलो भए पनि कतिपयमा भने त्यस्तो प्रवृत्ति नदेखिएको बताए । 

‘त्यस्तो प्रवृत्ति अन्य पार्टीहरूमा पनि देखिएको छ,’ उनले भने, ‘विभिन्न जिल्लाहरूको रिपोर्ट सुन्दा त्यति उत्साही हुने देखिँदैन ।

देशैभरि पार्टीको सञ्जाल छ, त्यसैले न्यूनतम उपस्थिति हुनैपर्छ भनिएको थियो ।’ 

यस्तै उनले मनोनयन दर्ता २ दिन राखिएको पनि शंका व्यक्त गरेका छन् । 

‘भोलि नोमिनेसन फाइल गर्न दुई दिन किन राखेको छ ? त्यहाँ पनि मलाई लाग्छ कुनै षड्यन्त्र होला,’ उनले भने, ‘११ गते मनोनयन दर्ता गर्लान्, मान्छेको अनुहार हेरेर १२ गते विद्रोही उम्मेदवार खडा गरिदिउँला भनेका होलान् । आफूले मात्रै तिकडम जानेको र अरूलाई पछार्न सक्छु भन्ने लाग्या होला । केन्द्र, प्रदेश, राष्ट्रिय सभा पछारिए अझै पनि होस् खुल्या छैन ।’