नेकपा एकीकृत समाजवादीका अध्यक्ष माधवकुमार नेपालले पाँचदलीय गठबन्धनलाई अगाडि बढाउनका लागि तालमेल भएको ठाउँमा इमान्दारीपूर्वक कार्यान्वयन गर्न आग्रह गरेका छन् ।

उनले नमिलेको ठाउँमा मिलाउनका लागि गठबन्धनका दलले माथिबाट पनि निर्देशन दिनुपर्ने बताए । 

चितवनको भरतपुरमा बिहीवार आयोजित चुनावी सभालाई सम्बोधन गर्दै नेता नेपालले गठबन्धनको भावना इमान्दारीपूर्वक लागू गर्नुपर्ने बताएका हुन् । 

‘आगामी चुनाव र त्यसपछि पनि गठबन्धनलाई लिएर जाने हो भने महानगर र उपमहानगरमा जसरी गठबन्धन गरेका छौं, ती ठाउँमा गठबन्धनको मर्मको इमान्दारितापूर्वक पालना गर्नुपर्छ । गठबन्धनलाई जिताउने कर्तव्य ठान्नुपर्छ,’ नेपालले भने । 

नेता नेपालले राम्रो काम गरेका कारण भरतपुरवासीको मनमनमा रेनु दाहालले बास गरेको दाबी गरे ।

‘यहाँ सबैले रेनु दाहालको नाम लिएको पाइयो । प्रचण्डको छोरी भन्ने पनि होइन, व्यवसायीले आफ्ना छोराछोरीलाई व्यवसायी, कलाकारले कलाकार बन्न प्रेरित गर्छ । योग्यताको आधारमा आउने हो,’ नेता नेपालले भने । 

उनले बागी उम्मेदवारी दिएका कांग्रेसका नेताहरूलाई उम्मेदवारी फिर्ता लिन आग्रह गरे ।

‘गठबन्धनभित्रबाट उम्मेदवारी दिएका नेताहरूलाई भन्न चाहन्छु, व्यक्तिगत कुण्ठाको विषय नबनाउनुस्, वक्तव्य दिएर फिर्ता लिनुस्,’ नेपालले भने ।