वीरगञ्ज महानगरपालिकाको मतगणना शुरू हुँदै

स्थानीय तह निर्वाचनअन्तर्गत मधेश प्रदेशको एकमात्र महानगरपालिका वीरगञ्ज महानगरपालिकाको मतगणना शनिवार बिहान १० बजेदेखि शुरू गरिँदैछ ।

वीरगञ्ज महानगरपालिका–१४ पिपरास्थित नृसिंह माध्यमिक विद्यालय हुने मतगणनाको कार्यका लागि अहिले सर्वपक्षीय तथा सर्वदलीय छलफल जारी छ । 

छलफलपश्चात् मतगणनाको अघि बढाइने तयारी गरिएको मुख्य निर्वाचन अधिकृत धर्मराज पौडेलले जानकारी दिए । मतगणनाको तयारीका लागि विद्यालयको ‘सी’ ब्लकमा मतगणना कक्षमा आवश्यक फलामे तारजालीसहित सीसीटीभी जडान गरिएको छ । 

जिल्लामा रहेका कूल १४ पालिकाको विभिन्न पदका जनप्रतिनिधिका निर्वाचनमा कूल ३ हजार २९७ जना चुनावी प्रतिस्पर्धामा रहेका छन् । १४ पालिका रहेको  जिल्लामा हाल १ लाख ४८ हजार २८३ महिला र १ लाख ९१ हजार ५३७ जना पुरुष र १६ जना तेस्रोलिंगी गरी ३ लाख ३९ हजार ८३६ जना  मतदाता रहेका थिए ।