राष्ट्रिय सभाको शुक्रवारको बैठकले संघीयता कार्यान्वयन, अध्ययन तथा अनुगमन संसदीय विशेष समिति गठन गरेको छ ।

जेठ १९ गतेको राष्ट्रियसभा बैठकबाट सर्वसम्मतरूपमा स्वीकृत भएको सङ्कल्प प्रस्तावमा उल्लेख भएअनुसार संघीयता कार्यान्वयन सम्बन्धमा राजनीतिक, वित्तीय, प्रशासनिक, संरचनागतलगायत सबै पक्षको अध्ययन गरी राष्ट्रिय सभामा प्रतिवेदन पेश गर्न सो विशेष समिति गठन गरिएको हो ।

सांसद डा. खिमलाल देवकोटाको संयोजकत्वमा गठित समितिमा सांसद प्रकाश पन्थ, उदयबहादुर बोहोरा, डा. विमला राई पौडेल, रामचन्द्र राई, मायाप्रसाद शर्मा र प्रमिलाकुमारी सदस्य तोकिएका छन् ।

विशेष समितिको कार्यावधि कार्य प्रारम्भ गरेको मितिले ४ महिना हुनेछ । सभाका अध्यक्ष गणेशप्रसाद तिमिल्सिनाद्वारा प्रस्तुत नामावली सहितको समिति गठनको प्रस्तावलाई बैठकले सहमति जनाएको छ ।