माधव नेपालले भने- नेपालमा विदेशी सेना रहेको सुनेँ, त्यो गम्भीर विषय हो

नेकपा (एकीकृत समाजवादी) का अध्यक्ष माधवकुमार नेपालले प्रधानमन्त्री शेरबहादुर देउवाले अमेरिका भम्रणबारे संसद, समिति र नागरिकलाई जानकारी दिनुपर्ने बताएका छन् । 

सोमवार प्रतिनिधि सभाअन्तर्गतको अन्तर्राष्ट्रिय सम्बन्ध समितिमा परराष्ट्र नीतिबारे बोल्दै अध्यक्ष नेपालले प्रधानमन्त्रीको अमेरिका भ्रमणको विषयमा धेरै प्रश्नहरू उठेको भन्दै प्रधानमन्त्रीले संसद, समिति र देशलाई जानकारी दिनुपर्ने बताएका हुन् । 

उनले भ्रमणमा देशलाई उचित हुने भन्दा बाहेक अन्य कुनै पनि गतिविधिहरू सरकारले गर्न नहुने बताए । 

‘नेपालले कुनै पक्षमा नलाग्ने असंलग्न परराष्ट्र नीति लाएका छौं । त्यो नीतिमा सरकार अविचलित रुपमा अगाडि बढ्नुपर्छ,’ उनले भने, ‘सरकारले आफ्नो नीतिका विषयमा सबैलाई स्पष्ट रुपमा राख्नुपर्छ । यो मामिलामा कुनै किसिमको दबाब,धम्की हामीलाई स्वीकार्य हुन सक्दैन ।’

उनले पहिलोपटक नेपालमा विदेशी सेना रहेको सुनेको पनि बताए । अध्यक्ष नेपालले विदेशी सेना नेपालमा आएर बस्नु गम्भीर विषय रहेको भन्दै समितिमा सरकारको ध्यानाकर्षण गर्न माग गरे । 

‘विदेशी सेना नेपालमा छन् भनेर मैले भर्खरै पहिलो चोटि सुनेँ । त्यो हो भने गम्भीर कुरा हो,’  उनले भने, ‘कुन–कुन देशका छन्, कुन क्याम्पमा राखिएको छ ? त्यसबारेमा समितिको ध्यान जानुपर्छ । सरकारको ध्यानाकर्षण गराउनुपर्छ ।’