संसद छलेको भन्दै देउवाविरुद्ध खेद प्रस्ताव पारित गर्न एमाले सांसदको माग

नेकपा एमालेका सांसद एवं पूर्व उपप्रधानमन्त्री भीम रावलले संसदलाई छलेर होटलको सेमिनारमा सहभागी भएको भन्दै प्रधानमन्त्री शेरबहादुर देउवाविरुद्ध खेद प्रस्ताव पारित गर्न माग गरेका छन् ।

संसदमा जवाफ दिन नआएको भन्दै अन्य सांसदले पनि देउवाको विरोध गरे ।

प्रतिनिधि सभामा बिहीवार विनियोजन विधेयकमाथि उठेका प्रश्नको जवाफपछिको स्पष्टीकरणमा एमाले सांसद रावलले देउवाको रवैया लोकतन्त्रप्रतिको खेलवाड भएको बताए ।

‘जुन देशको प्रधानमन्त्री जरुरी काम पर्‍यो भनेर र्‍याडिसन होटलको सेमिनारमा जान्छ । लोकतन्त्रमा यहाँभन्दा गैरजिम्मेवार काम के हुन्छ ? उहाँविरुद्ध खेद प्रस्ताव पारित गर्न मन्त्रीको के छ राय ?’ रावलले देउवाको तर्फबाट जवाफ दिएका सञ्चारमन्त्री ज्ञानेन्द्रबहादुर कार्कीलाई प्रश्न सोधे । 

देउवा अनुपस्थित भएपछि रक्षामन्त्रीको तर्फबाट गृहमन्त्री बालकृष्ण खाँणले जवाफ दिएका थिए । प्रधानमन्त्री संसदमा नआएको भन्दै नेमकिपा सांसद प्रेम सुवालले नियमापत्ति गरेपछि सभामुख अग्नि सापकोटाले देउवाले कार्यव्यस्तताका कारण आउन नसकेको जानकारी गराएको बताए ।
 
‘संसदलाई बेवास्ता गरी प्रधानमन्त्री के कार्यक्रममा जानुभयो ? जान मिल्छ कि मिल्दैन ? सभामुखले रुलिङ गर्नुपर्‍यो,’ नेमकिपा सांसद प्रेम सुवालले भने ।

संसदमा जवाफ दिन छाडेर देउवा भने गैरआवासीय नेपाली संघ (एनआरएन) को कार्यक्रममा सहभागी भएका थिए ।