ओलीको पालामा संसदमा लगिएको नागरिकता विधेयक आज फिर्ता हुँदै

नागरिकता (पहिलो संसोधन) विधेयक २०७५ लाई आज सरकारले संसदबाट फिर्ता लिने भएको छ ।

पूर्ववर्ती केपी शर्मा ओली नेतृत्वको सरकारले २०७५ सालमा प्रतिनिधि सभामा दर्ता गराएको विधेयक बिहीवार फिर्ता गर्न लागिएको हो । 

संसदको चालु अधिवेशनमा पारित गर्ने गरी नयाँ विधेयक ल्याउने भन्दै लामो छलफल पछि समितिमा सहमति भइसकेको विधेयक सरकारले फिर्ता गर्न लागेको हो । 

बिहीवार दिउँसो बस्ने प्रतिनिधि सभा बैठकमा गृहमन्त्री बालकृष्ण खाँणले विधेयक फिर्ता लिइयोस् भन्ने प्रस्ताव पेश गर्ने कार्यसूची छ । 

मन्त्रिपरिषद्को हालैको बैठकले नागरिकता विधेयक फिर्ता गर्ने निर्णय गरेको थियो । 

संसदमा विचाराधीन विधेयक मन्त्रिपरिषद् बैठकले निर्णय गरेर फिर्ता लिन सक्छ । अधिकारकर्मीहरूले भने नागरिकता विधेयक छिटो पारित गर्न माग गरेका छन् ।

बिहीवार नै प्रतिनिधि सभाबाट सामाजिक सुरक्षा (पहिलो संशोधन विधेयक) २०७९ पारित गर्ने कार्यसूची छ ।