किन विवादित बन्यो भुवनले बनाएको सल्लाहकार समिति ?

चलचित्र विकास बोर्डले गठन गरेको सल्लाहकार समितिलाई लिएर विवाद शुरू भएको छ ।  

बिहीवार बोर्ड अध्यक्ष भुवन केसीको अध्यक्षतामा बसेको बोर्ड बैठकले नीर शाहको संयोजकत्वमा ६ सदस्यीय सल्लाहकार समिति गठन गरेको छ । 

उक्त समिति गठन भएको २४ घण्टा नबित्दै विवाद शुरू भएको हो ।  सल्लाहकार समितिको सदस्यमा आकाश अधिकारी, रविन्द्र खड्का, विधान कार्की, शोभित बस्नेत र सुशान्त श्रेष्ठ छन् ।

चलचित्र समीक्षक यज्ञश, निर्देशक दीपेन्द्र लामा लगायतका चलचित्रकर्मीले सामाजिक सञ्जालमार्फत समितिको आलोचना गरिरहेका छन् ।

यज्ञशले समिति समावेशी नभएको भन्दै आलोचना गरेका छन् । उनले बोर्ड सदस्य र कर्मचारी नै सल्लाहकार हुनुपर्ने तर्क गरेका छन् । उनले लेखेका छन्,‘चलचित्र विकास बोर्डले पूर्व अध्यक्ष नीर शाहको संयोजकत्वमा पाँच जनाको सल्लाहकार समिति बनाएछ । पहिले भएर पनि थाहा नभएको हो कि पहिलोचोटी यस्तो समिति बनेको हो थाहा भएन । बोर्डलाई यत्रो विघ्न सल्लाह किन चाहिने रहेछ, बोर्ड सदस्य र कर्मचारी नै अध्यक्षका सल्लाहकार हुनुपर्ने हैन र ? त्यसमाथि नेपाल राष्ट्रले समावेशी सिद्धान्तलाई संविधानतः अंगिकार गरेको कुरा हो । यसको अर्थ सरकारी नियुक्ति, मनोनयन सबै त्यही सिद्धान्तअनुरूप हुनैपर्छ । बोर्डका सल्लाहकारमा एकजना पनि महिला छैनन् । समावेशी हुनुपर्छ भन्ने बोर्ड, संचार मन्त्रालय र यो सरकारलाई थाहा छैन ? यस्तो कुरामा मनोनित हुनेहरूले पनि विचार पुर्याउनु उचित हुन्छ ।'

यता निर्देशक दीपेन्द्र लामाले ६ सदस्यीय सल्लाहकार समिति गठन गर्दा एकजना पनि महिला नपरेको भन्दै विरोध जनाएका छन् ।

उनी फेसबुकमा लेख्छन् ‘चलचित्र विकास बोर्डले ६ सदस्यीय सल्लाहकार समिति गठन गर्दा एकजना पनि महिला नसमेटेकोमा मेरो विरोध छ । अध्यक्ष भुवन केसीले त यो कुरामा विचार पुर्याएनन् पुर्याएनन्, सल्लाहकार समितिका संयोजक नीर शाहले समेत अनदेखा गर्नुभएकोमा आश्चर्य लागेको छ । कि, कांग्रेसीजनहरुले समावेशीय सिद्धान्त पोलेर खाएका हुन्  ?’ कतिपयले सल्लाहकार समितिमा राखिएका व्यक्तिको क्षमता र योगदानमै प्रश्न उठाएका छन् ।