ग्रामिण अर्थतन्त्रको विकासका लागि सरकारले लघुवित्त लगानी कोष बनाउँदै

सरकारले ग्रामिण अर्थतन्त्रको विकासका लागि लघुवित्त लगानी कोष निर्माण गर्ने तयारी गरेको छ । अर्थमन्त्री जनार्दन शर्माले साना किसान र ग्रामिण अर्थतन्त्रको विकास गर्न नसके मुलुक आर्थिक समृद्धिको बाटोमा जान नसक्ने बताउँदै सरकारले लघुवित्त कोष निर्माणको तयारी रहेको जानकारी दिएका हुन् । 

मंगलवार काठमाडौंमा निक्षेत्र तथा कर्जा सुरक्षण कोषको वार्षिकोत्सवलाई सम्बोधन गर्दै उनले मुलुकमा आर्थिक समृद्धि ल्याउनको लागि ग्रामिण अर्थतन्त्रमा जोड दिन आवश्यक रहेको बताए । मन्त्री शर्माले सरकारले अब ग्रामिण अर्थतन्त्रलाई जोड दिएर ग्रामिण क्षेत्रमा भएको स्रोत र साधनको प्रयोग गरी उत्पादन वृद्धि गर्ने बताए ।

मन्त्री शर्माले कृषि कर्जा लिएर जग्गामा लगानी गर्ने अवस्थाको अन्त्य हुनुपर्ने बताए । उनले साना किसान र ग्रामिण अर्थतन्त्र सबल बनाउनको लागि अहिले बैंक तथा वित्तीय संस्थाहरुको कर्जा नीतिहरू परिर्वतन गर्न आवश्यक रहेको बताए । 

‘सरकारले लघुवित्त लगानी कोष बनाउने तयारी गरेको छ । सरकारी संस्थानहरुमा भएको कोषहरुको समेत लगानी रहने गरी मन्त्रालयले नियमावली र कार्यविधि बनाइरहेको छ । साना किसानहरुलाई उनीहरुको घर दैलोमा लगानी गर्नका लागि यसले काम गर्नेछ’, मन्त्री शर्माले भने, ‘सरकारले सहुलियतपूर्ण ऋण सबैभन्दा कमजोर समुदाय, साना किसान र साना उद्यमीहरू भएको ठाउँमा पुर्‍याउनु पर्छ भन्ने विषय बजेटले व्यवस्था गरेको छ । धेरै संख्यामा रहेका साना किसानहरु र ग्रामिण क्षेत्रमा ग्रामिण अर्थतन्त्रको विकास नगरी नेपालमा समृद्धिको बाटोमा जान सक्दैनौँ । ग्रामिण अर्थतन्त्रलाई जोड दिने गरेर सरकार जाने हो । शहरमा पनि बेरोजगार र सुकुम्वासीहरु रहेका छन् । उहाँहरुलाई पनि उद्यमशीलतामा जोड्ने विषय छ । ग्रामिण अर्थतन्त्रलाई जोड दिएर ग्रामिण क्षेत्रमा भएको स्रोत र साधनको प्रयोग गरेर त्यसबाट उत्पादन वृद्धि गरेर आवश्यक प्रविधिको विकास गर्नुपर्ने आवश्यकता छ । कृषि कर्जा लिएर जग्गामा लगानी गर्ने अवस्थाको अन्त्य हुनुपर्छ ।’