नेपाल असफल राष्ट्र हुनबाट जोगियो तर, अझै ‘ट्रान्जिसन’मा छ : प्रधानमन्त्री

प्रधानमन्त्री तथा नेपाली कांग्रेसका सभापति शेरबहादुर देउवाले अहिले मुलुक ‘ट्रान्जिसन’को अवस्थामा रहेको बताएका छन् । ललितपुरमा गठबन्धन दलका कार्यकर्ताको संयुक्त भेलालाई मंगलवार सम्बोधन गर्दै देउवाले भने, ‘नेपाल राष्ट्र यति बेला ट्रान्जिसनमा छ । लोकतन्त्रलाई स्थायी बनाउनुछ ।’

आगामी चुनावबाट देश स्थायी लोकतन्त्रको बाटोमा जाने उनले बताए ।  

कार्यक्रममा देउवाभन्दा अघि बोलेका प्रचण्ड र माधव नेपालले केपी ओलीको विरोध गरेका थिए । देउवाले पनि त्यसलाई निरन्तरता दिए । भर्खर चुनावको बेला भएको तर तत्कालीन प्रधानमन्त्री केपी शर्मा ओलीले दुई वर्ष अगाडि नै संसद विघटन गरेको भन्दै उनले त्यसको विरोध गरे । 

‘ओलीजीले दुई पटक संसद् भंग गरे । संविधान बनाउँदा कुनै पनि हालतमा संविधान भंग गर्न पाइँदैन भन्ने व्यवस्था गरिएको थियो । राति २ बजे राष्ट्रपतिलाई उठाएर संसद भंग गरिदिनुभयो । साँझ गरेको भए हुन्थ्यो । बिहान गरेको भए पनि हुन्थ्यो । भर्खर चुनावको बेला भएको छ । यहाँले २ वर्ष अघि नै संसद भंग गरिदिनुभयो’, देउवाले भने । 

अब नेपाल स्थायी शान्तिको बाटोमा अघि बढेको पनि उनले बताए । नेपाललाई असफल राज्य हुनबाट गठबन्धनले जोगाएको पनि उनले बताए । ‘नेपाल असफल राज्य हुनबाट जोगिएको छ । नेपाल स्थायी शान्तितिर अगाडि बढेको छ । आर्थिक अवस्था सुधार हुन थालेको छ । नेपालको समावेशी प्रजातन्त्र अध्ययन गर्न विदेशीहरू आउन थालेका छन्’, देउवाले भने । 

आगामी चुनावमा गठबन्धनमा रहेका दलका कार्यकर्ता र मतदाताले एक अर्काको चुनाव चिह्नमा भोट हाल्न हिचकिचाउन नहुने पनि उनले बताए । ‘अब को हँसिया हथौडा, को रुख, को कलम भन्ने नै छैन । कलम भएको ठाउँमा कलमलाई नै भोट हाल्ने, हँसिया हथौडा भएको ठाउँमा हँसिया हथौडामा नै भोट हाल्ने र रूख भएको ठाउँमा रुखलाई नै भोट हाल्ने । यत्ति भए पुगिहाल्यो नि’, देउवाले भने ।  

कोभिडको कारणले धेरै मानिसको ज्यान गएको र आर्थिक रूपमा पनि कमजोर भएको स्मरण गर्दै उनले अहिले देशको आर्थिक अवस्था सुधार हुँदै गएको बताए । आगामी दिनमा नेपालले विद्युत् व्यापार गरेर समृद्धिको यात्रा तय गर्न सक्ने पनि देउवाले बताए । 

‘हामीले चीनलाई विद्युत् बिक्री गर्न सक्ने अवस्थामा छैनौँ । भारतलाई नै बिक्री गर्ने हो । भारतलाई विद्युत् बिक्री गरेर भए पनि देशलाई समृद्धिको यात्रामा लैजान सकिन्छ’, उनले भने ।