देश दौडाहामा गठबन्धनका नेता, देउवा–प्रचण्ड एकैदिन धनगढी र सुर्खेतको कार्यक्रममा

प्रधानमन्त्री एवं नेपाली कांग्रेसका सभापति शेरबहादुर देउवा पाँच दलीय गठबन्धनद्वारा आज कैलालीको धनगढीमा आयोजित प्रदेश स्तरीय प्रशिक्षण तथा भेलालाई सम्बोधन गर्न त्यहाँ पुगेका छन् । 

भेलालाई सम्बोधन गर्न प्रधानमन्त्री देउवाका साथै नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी) का अध्यक्ष माधवकुमार नेपाल, कांग्रेसका वरिष्ठ नेता रामचन्द्र पौडेलसहितका शीर्ष नेता धनगढी पुगेका हुन् । अहिले गठबन्धनका शीर्ष नेताहरुले सम्बोधन गर्ने क्रम जारी छ । 

आगामी मङ्सिर ४ गते हुने प्रतिनिधिसभा र प्रदेशसभा निर्वाचनलाई लक्षित गरी पाँच दलीय गठबन्धनले धनगढीमा सुदूरपश्चिम प्रदेश स्तरीय भेला तथा प्रशिक्षणको आयोजना गरेको हो । 

धनगढीपछि शीर्ष नेताहरू आजै हुने सुर्खेतमा हुने कार्यक्रममा सहभागी हुनेछन् । 

हिजाे गठबन्धनका शीर्ष नेताहरू प्रदेश १ र मधेश प्रदेशकाे राजधानीमा आयाेजित भेलामा सहभागी हुन विराटनगर र जनकपुर पुगेका थिए ।