मेरा विरोधीहरूले २ करोड बिरुवा रोपेर देखावोस् ! अनि बल्ल पत्याँउछु, नत्र उस्स : हर्क साम्पाङ

धरानका मेयर हर्क साम्पाङले पाँच वर्षभित्र १ करोड बिरुवा रोप्ने घोषणा गरेका छन् । सामाजिक सञ्जालमा सन्देश लेख्दै उनले आफ्ना विरोधीहरूलाई आफूले भन्दा बढी बिरुवा रोपेर देखाउनु पनि चुनौती दिएका छन् । 

उनले मेयर पदको कार्यकाल अवधिभर धरानका कुनै पनि पाखा, भित्ता खाली नराखी वृक्षरोपन गर्ने जानकारी दिएका छन् । उनले सामाजिक सञ्जालमा लेखेका छन्, ‘मेरो कार्यकालमा १ करोड बिरुवा रोप्नेछौँ । पाखा-भित्ता कहीँकतै खाली रहने छैन । मसँग जोरी खोज्ने मेरा विरोधीहरुले २ करोड बिरुवा रोपेर देखावोस् ! अनि बल्ल पत्याँउछु, नत्र उस्स !’

उनले आफूले रोप्ने बिरुवामा फलफूलको बोट हुने पनि उल्लेख गरेका छन् । उक्त फलफूलका कारण बाटोमा हिँड्ने कोही पनि बटुवा भोकै हिँड्न नपर्ने उनको भनाइ छ । उनले लेखेका छन्, ‘पाखा, भित्ता, वन, जंगल सबैतिर माटोभरि यति धेरै फलफूलका बिरुवा रोपौँ, यति धेरै रोपौँ, यति धेरै रोपौँ कि, कोही बटुवा भोकै यात्रा गर्न नपरोस् । जहाँ गए पनि खान पाउने स्थिति होस् ।’