मधेश प्रदेश मिडिया काउन्सिलका अध्यक्ष शिवहरि भट्टराई होटलमा मृत अवस्थामा भेटिएका छन् ।

सर्लाहीको लालबन्दी–१३ पत्थरकोटास्थित होलिडे रिसोर्टमा शनिबार विहान उनलाई मृत भेटिएको मिडिया काउन्सिलका प्रशासकीय प्रमुख मुनेश्वर यादवले बताए । 

नेपाल पत्रकार महासंघ सर्लाही शाखाको साधारणसभामा भाग लिन उनी शुक्रबार सर्लाही पुगेका थिए । कार्यक्रम शनिबारको लागि तय गरिएको थियो । 

भट्टराई नेपाल पत्रकार महासंघ सप्तरी शाखाका संस्थापक सभापति र नेपाल पत्रकार महासंघ पूर्व केन्द्रीय उपसभापति पनि हुन् । 

होटलमा साँझ खाना खाएर सुतेका भट्टराई विहान साधारण सभा शुरू हुने बेलामा खोज्दा सुतेकै कोठामा मृत अवस्थामा भेटिएको यादवले बताए । 

उनी सुतेको कोठामा बान्ता गरेको पाइएको र उनको हातमा पनि औषधि भेटिएको प्रहरीले बताएको छ । भट्टराईले मधुमेह र उच्च रक्तचापको औषधि सेवन गर्ने गरेका थिए ।

घटनाको बारेमा थप अनुसन्धान भइरहेको जिल्ला प्रहरी कार्यालय सर्लाहीले बताएको छ ।