नेकपा एकीकृत समाजवादीकी सचिव रामकुमारी झाक्रीले आफू निर्वाचनमा पराजित हुँदा मतदातालाई धेरै पीडा भएको उल्लेख गरेकी छन् । आफू समर्थकहरूसँगको तस्वीर सामाजिक सञ्जालमा शेयर गर्दै उनले चुनाव सामुहिक प्रयास भएको पनि उल्लेख गरेकी छन् । 

उनी गुल्मी क्षेत्र नम्बर २ बाट प्रतिनिधि सभा सदस्य पदमा नेकपा एमालेका गोकर्ण विष्टसँग पराजित भएकी थिइन् । निर्वाचन परिणाम सार्वजनिक भएपछि निर्वाचन क्षेत्रका मतदाताहरूसँग भेटघाटमा रहेकी उनले आफूलाई मतदान गर्ने मतदाताहरू पीडाले भक्कानिएर रुने गरेको उल्लेख गरेकी छन् । 

उनले सामाजिक सञ्जालमा लेखेकी छन्, ‘आफ्नो जिन्दगीकै पहिलो पटक भोट हाल्ने  मतदाता हुन यि बहिनी, उनले हाम्रो लागि मतदान गरेकी थिइन । हामीलाई टिका र माला लगाइदिँदै गर्दा भक्कानिएर रोइन, यिनै र यस्तै मतदातालाई सम्झेर म गाउँतिरै छु । चुनाव सामुहिक प्रयास हो । उम्मेद्वारलाई भन्दा धेरै मतदातालाई पीडा छ, यो हामीले राम्रोसँग बुझेका छौँ ।’