‘सिङ्गल मान्छे मलाई पैसा किन चाहियो ?’

नेकपा (माओवादी केन्द्र) का नेता एवं उपप्रधान तथा भौतिक पूर्वाधारमन्त्री नारायणकाजी श्रेष्ठले आफू पावर र पैसाका लागि नभइ काम गर्नका लागि पदमा आएको बताएका छन् । आफू सिङ्गल भएकाले पैसाको आवश्यकता नभएको पनि उनले बताए ।

मेयरसिंह जौवारी प्रतिष्ठानले शनिबार यहाँ आयोजना गरेको ‘बधाई तथा शुभकामना’ कार्यक्रममा मन्त्री श्रेष्ठले त्यस्तो बताए । ‘मलाई पैसाको कुनै लालच छैन, सिङ्गल मान्छे मलाई पैसा किन चाहियो ?’ उनले जिज्ञासा गरे ।

आफ्नो पद पावरका लागिभन्दा पनि देशको सेवा भावले केही गर्नुपर्छ भन्ने आफ्नो सोच रहेको सुनाए । नेता श्रेष्ठ अविवाहित छन् । पैतृक सम्पति समेत बेचेर ऋण तिरेको उनको भनाइ छ । आफूसँग कुनै चलअचल सम्पत्ति तथा एक कित्ता शेयर पनि नरहेको उनले बताए ।

माओवादी केन्द्रका वरिष्ठ उपाध्यक्ष समेत रहेका श्रेष्ठले भने, ‘न घर छ, न जग्गा छ, भएको पैतृक सम्पत्ति पनि बेचेर ऋणपान तिरेँ, बाँकी रहेको पैसा पार्टीकै लागि दिएको छु ।’ आफूलाई यहाँसम्म ल्याउन प्रतिष्ठान र आफ्ना नातेदारहरुको भूमिका पनि महत्वपूर्ण रहेको उनले बताए । 

‘तपाईहरुले मलाई कुनै अनावश्यक काम गर्न दवाव दिनु भएन, तपाईहरुको हौसला मेरालागि सधै प्रेरणा बन्यो’ उनले भने, ‘ऐन, नियम विपरित तपाईहरुले मलाई काम गर्न कुनै दवाव दिनु भएन र त म अहिले यहाँ छु ।’ 

कार्यक्रममा प्रतिष्ठानका सचिव मनोवावु श्रेष्ठले माओवादी शान्ति प्रक्रियामा आउँदादेखि हालसम्म पनि नेता श्रेष्ठको भूमिका सधै केन्द्रमा रहेको बताए । नेता श्रेष्ठको काम गराइले अहिलेको सरकार पनि जनमूखी हुनेमा आफू विश्वस्त रहेको बताए ।