माओवादी जनयुद्धले गणतन्त्र ल्याएको होइन, राजनीतिक स्वार्थका लागि १७ हजार मारिए- केपी ओली

नेकपा एमालेका अध्यक्ष केपी शर्मा ओलीले माओवादी जनयुद्धले नेपालमा गणतन्त्र स्थापना नभएको दाबी गरेका छन् ।

२०६३ सालको शुरुमै माओवादी हिंसाको अन्त्य भए पनि २०६५ सालमा मात्र गणतन्त्र स्थापना भएको उनले बताए । 

सुखानी घटनाको ५० औं स्मृति दिवसमा आइतबार एमाले पार्टी केन्द्रीय कार्यालयमा आयोजित कार्यक्रमलाई सम्बोधन गर्दै ओलीले राजनीतिक स्वार्थका लागि भएको आन्दोलनमा १७ हजारको मृत्यु भएको बताएका हुन् । 

‘२०५२ सालपछि राजनीतिक स्वार्थका लागि १७ हजार मारिए ।

'नेपालमा भएको के प्राप्तिका लागि मारिए, बहुदलीय व्यवस्था छँदै थियो । अहिले गणतन्त्रका लागि भएको भनिन्छ । २०६३ सालको शुरुमै हिंसा समाप्त भयो, त्यसै वर्ष शान्ति सम्झौता भयो । २०६५ जेठमा गणतन्त्र स्थापना भयो, जनयुद्धले राजतन्त्र हटाएन होला’, ओलीले भने ।

ओलीले माओवादी आन्दोलनका क्रममा मारिएका १७ हजारको औचित्य पुष्टि हुन नसक्ने बताए । ‘संविधानसभाका लागि १७ हजार मर्नुपर्छ र ?’ उनले प्रश्न गरे ।