तिलोत्तमा सरसफाई अभियान १००औं शृंखलामा, विभिन्न कार्यक्रम गरिँदै

रुपन्देहीको तिलोत्तमा नगरपालिकामा समुदायमा आधारित हरियाली प्रवद्र्धन एवं नियमित नगर सरसफाई अभियानको १००औं शृंखला भव्यताका साथ मनाउन विभिन्न कार्यक्रम आयोजना गरिएका छन् ।

तिलोत्तमा नगरपालिकामा २०७४ सालबाट शुरू भएको हरियाली प्रवद्र्धन एवं नियमित सरसफाई अभियान निरन्तर सञ्चालनमा रहेको छ । 

आगामी चैत्र १ गते १००औं शृंखलामा पुग्ने अभियान अन्तर्गत् हरेक महिनाको १ र १५ गते नगर प्रमुख, उपप्रमुख लगायतका जनप्रतिनिधिको सहभागितामा नगरस्तरीय सरसफाई अभियान सञ्चालन हुँदै आएको छ । वडा कार्यालय र टोल विकास संस्थाहरू समेतले नियमित सरसफाई अभियान चलाउँदै आएका छन् । 

सम्भवतः निरन्तर सञ्चालनमा रहेको तिलोत्तमाका सरसफाई अभियान उपत्यका बाहिरको पहिलो हो । निरन्तर सरसफाई अभियान चलाएको तिलोत्तमाले आफूलाई मुलुककै पहिलो पूर्ण सरसफाईउन्मुख नगरपालिका बनाउन सफल भएको छ । 

चैत्र १ गते पुग्ने १००औं शृंखलालाई भव्यताका साथ मनाउन फागुन २५ गतेबाट सप्ताहव्यापी कार्यक्रम आयोजना गरिएको बुधवार आयोजित पत्रकार अन्तर्क्रिया कार्यक्रममा नगर प्रमुख रामकृष्ण खाँणले जानकारी दिए । सरसफाईलाई नगरवासीको जीवन पद्धतिसँग जोडेर दीगो बनाउनेतर्फ नगरपालिका अग्रसर रहेको उनले बताए  ।

कार्यक्रम अन्तर्गत फागुन २७ गते नगरस्तरीय सरसफाई र रक्तदान, फागुन ३० गते मानव साङ्लो सहितको सिक्सलेन सफाई र चैत्र १ गते १००औं शृखंलाको स्मारक उद्घाटन, झाँकीप्रदर्शन तथा सम्मान कार्यक्रम र ‘नो हर्न’ नगरपालिका घोषणा कार्यक्रम तय गरिएको नगरपालिकाले जनाएको छ ।

नगरपालिका, वडा कार्यालय र टोल विकास संस्थामार्फत् हुने सम्पूर्ण कार्यक्रममा सक्रियतापूर्वक सहभागिता जनाउन नगरपालिकाले सबै नगरवासीमा आह्वान समेत गरेको छ । सप्ताहव्यापी कार्यक्रममा सक्रियतापूर्वक सहभागिता जनाउँदै आफ्नो घरआँगन, सडक, व्यावसायिक प्रतिष्ठान, कार्यालय, चोक, टोल, सार्वजनिक स्थानमा सघन सरसफाई गर्न सम्पूर्ण नगरवासीमा अनुरोध गरिएको नगर उपप्रमुख जागेश्वरी चौधरीले बताइन् । 

चैत्र १ गतेबाटै तिलोत्तमामा कुहिने र नकुहिने फोहोर अलग–अलग उठाउने कार्यक्रम पनि शुरू हुँदैछ । नगरपालिकाले ‘ग्रीन तिलोत्तमाः क्लिन तिलोत्तमा’को महाअभियानलाई सफल बनाउन चरणबद्ध रूपमा सरकोकारवालाहरूसँग छलफल गरिसकेको छ ।

अभियानलाई थप प्रभावकारी रूपमा अघि बढाउन सम्बद्ध सबै पक्षका सुझाव संकलन गरिएको हरियाली प्रवद्र्धन तथा सरसफाई व्यवस्थापन तथा कार्यान्वयन समिति संयोजक सुरेन्द्र श्रीले बताए ।