नेकपा एकीकृत समाजवादीका अध्यक्ष माधव कुमार नेपालले एमालेसँग पनि एकता गरेर जान सकिने बताएका छन्। 

बुधबार पार्टीको केन्द्रीय प्रचार विभागले काठमाडौंमा आयोजना गरिएको ‘सम्पादकसँग भेटघाट तथा अन्तरक्रिया’मा केपी ओलीप्रति संकेत गर्दै उनले मति सप्रियो भने एमालेसँग पनि एकता गरेर जान सकिने स्पष्ट पारेका हुन्।

देशभरका सबै वामपन्थी शक्तिहरूलाई एकताबद्ध गरेर अघि बढ्न आफ्नो पार्टीले चाहेको पनि अध्यक्ष नेपालले पटकपटक दोहोर्‍याए।

‘त्यसका लागि पहिलो सहकार्य गर्ने, कसैकसैले हामीलाई कम्युनिष्ट शक्तिको रूपमा हामीलाई व्यंग्य गरेको पनि पाइएको छ । त्यस्तो व्यंग्यको कुनै पनि अर्थ छैन । हामी खुट्टी देखेरे मान्छेलाई चिन्दछौं । प्रतिगामीहरूसँग साँठगाँठ गर्नेहरूसँग हामीमाथि औंलो ठड्याउने कुनै अधिकार छैन । हामी सबै कम्युनिष्ट शक्तिहरू एकताबद्ध बनौं । इमान्दार कम्युनिष्टको रुपमा अगाडि बढौं भन्ने चाहन्छौं,' नेपालले भने। 

उनले थपे, 'त्यस्ताहरूसँग पनि मिल्छन् भने हामी पार्टीगत रूपमा एकता गरेर जान चाहन्छौं । तर हाम्रो पार्टी कुनै पार्टीमा विलय भएर समाप्त हुनेवाला छैन । यो आन्दोलनलाई हामीले नयाँ चरणबाट अगाडि बढाएका छौं । हाम्रो पार्टीको भूमिकालाई सबैले महसुस गर्दै आएका छन् । हिजो यसको महत्व केही पनि छैन भन्नेहरूले पनि विस्तारै लेखो राख्न थालेका छन् । चासो राख्न थालेका छन् । यो पनि खुशीकै कुरा हो ।'

​त्यस अवसरमा अध्यक्ष नेपालले मिटरब्याज पीडितहरूको समस्या समाधानका लागि सरकारले अघि बढाएको कदमको पनि खुलेर प्रशंसा गरे।