सीमा विवादका कारण २ मेयरबीच सामाजिक सञ्जालमा दोहोरी चल्न थालेको छ ।

धरान–इटहरी सीमा विवाद बाहिर आएपछि सामाजिक सञ्जालमा २ मेयरको दोहोरी शुरू भएको हो ।

धरान र इटहरीबीच विवाद देखिएपछि इटहरीका मेयर हेमकर्ण पौडेलले सहकार्यको प्रस्ताव गरेका थिए । धरानका मेयर हर्कराज राई (हर्क साम्पाङ) ले इटहरीको तरहरा नजिकै पानीपियामा धरानको बोर्ड राखेपछि विवाद बढेको हो ।

इटहरीको सिमाना मिचिएको भन्दै राष्ट्रिय युवासंघ इटहरीले बोर्ड उखेलेर लगेको थियो । सोही विषयमा सहमति र सहकार्यका साथ आन्तरिक विषय हल गर्नुपर्ने प्रस्ताव मेयर पौडेलले राखिरहेका बेला साम्पाङले भने मेयर पौडलप्रति नै प्रश्न उठाएका थिए ।

बहस चर्किंदै गएपछि बिहीवार फेसबूकमार्फत कालापानी र लिपुलेकमा झण्डा लिएर सँगै जान उनले प्रस्ताव गरेका छन् ।

आन्तरिक सिमानाको लागि मिलेर जानुपर्ने प्रतिक्रिया सामाजिक सञ्जालमा आएपछि त्यसलाई ध्यान दिन सुझाव दिएका छन् । 

उनले भनेका छन्, ‘धरान नगर प्रमुखज्यू नमस्कार ! सामाजिक सञ्जाल हेर्नुभएको छ ? जनता छिमेकी भएर झगडा नगर, लिपुलेक र कालापानीको सिमाना खोज्न जाऊ भन्दैछन् । बोकौं चन्द्रसूर्य झण्डा, बाँधौं टाउकोमा कफन, मारिए शहीद, बाँचे योद्धा, जाने मेयरज्यू ? म तपाईंसँग सहकार्य गर्न तयार छु । जय नेपाल !’
    
मेयर पौडेलले सामाजिक सञ्जालमा यस्तो स्ट्याटस लेखेपछि त्यसको प्रतिकार गर्दै हर्कले अर्को स्ट्याटस लेखेका छन् । उनले लेखेका छन्, ‘कहिल्यै अफिसबाट बाहिर ननिस्किनेले लिम्पियाधुरा जाऔं भनेछ ।’