सरकारले छोटो समयमै महत्त्वपूर्ण काम गरेको छ : मन्त्री शर्मा

नेपाल सरकारका सूचना, सञ्चार तथा प्रविधिमन्त्री रेखा शर्माले सरकारले छोटो समयमै महत्त्वपूर्ण काम गरेको बताएकी छन् ।

दाङको राप्ती गाउँपालिकामा नेकपा माओवादी केन्द्रका पार्टी कार्यकर्ता भेटघाट कार्यक्रममा उनले सरकारले समयमै हरेक विद्यार्थीको हातहातमा पाठ्यपुस्तक पुर्‍याएको बताइन् ।

उनले भनिन्, ‘पछिल्लो समय ज्येष्ठ नागरिकले पाउँदै आएको सामाजिक सुरक्षा भक्ता कटौती गर्दैछ भनेर पनि प्रचार गरिएको छ, यो सरासर गलत हो ।’ यो बारेमा अहिलेको सरकारले कुनै निर्णय नलिएको र यो विषय सोच्नै नसक्ने भन्दै सरकारलाई बदनाम गराउनेले ज्येष्ठ नागरिक भत्ता कटौती गर्दैछ भनेर हल्ला फिजाइरहेको बताइन् ।

मन्त्री शर्माले सरकारले गरेका सकारात्मक कामलाई पार्टी कार्यकर्ताले जनतासामु लैजान र जनताका समस्या सरकारसम्म ल्याउन आग्रह गरिन् । सरकार खेतीको समयअगावै सबै किसानको पहुँचमा मलखाद पुर्‍याउन प्रतिबद्ध रहेको बताइन् ।

उनले मिटरब्याजी पीडितका समस्या सधैंका लागि अन्त्य गर्नका लागि कानून निर्माण गरी हल गर्ने प्रक्रियामा सरकार रहेको जानकारी दिइन् ।