मच्छिन्द्रनाथको रथयात्रा रोकिने कारण देखाएर रद्द भयो 'एलिभेटेड मेट्रो रेल' परियोजना

ललितपुरको सातदोबाटोदेखि काठमाडौंको रत्नपार्क हुँदै नारायणगोपाल चोकसम्म सञ्चालन हुने भनिएको 'एलिभेटेड मेट्रो रेल' अब नबन्ने पक्कापक्की भएको छ ।

ललितपुर महानगरपालिकाले रातो मच्छिन्द्रनाथको रथ यात्रामा अवरोध हुने कारण देखाएर सहमति नदिएको तथा आवश्यक चौडाइ पनि नपुग्ने देखिएकाले काठमाडौं उपत्यकामा जमिनमाथिको मेट्रो रेलको सपना साकार नहुने पक्का भएको हो ।

रेल विभागले काठमाडौंमा  मेट्रो रेलको सम्भाव्यता अध्ययन गर्नका लागि डीपीआर तयार गर्न चिनियाँ कम्पनी सो युवानसँग २० जनवरी २०२० मा ६ करोड ११ लाख रुपैयाँको सम्झौता गरेको थियो ।

आठ महिनामै काम सम्पन्न गर्ने सम्झौता भएकोमा परामर्शदाताले विद्यमान सडकको चौडाइ अपर्याप्त भएकाले एलिभेटेड मेट्रो रेल उपयुक्त नहुने भनेपछि ठेक्का समेत रद्द भइसकेको छ ।

सातदोबाटो-रत्नपार्क-नारायणगोपाल चोक ११.६ किलोमिटर मेट्रो रेलको डिजाइनका लागि परामर्शदाताले फिजिबिलिटीको काम शुरू गर्न लाग्दा ललितपुर महानगरले रातो मच्छिन्द्रनाथको रथ यात्रामा अवरोध हुने कारण देखाएर असहमति जनाएको थियो ।

रेल विभागका प्रवक्ता अमन चित्रकारले जमिनमाथि मेट्रो रेल बनाउँदा रातो मच्छिन्द्रनाथको रथ यात्रामा अवरोध हुने भनी ललितपुर महानगरले सहमति नदिएपछि जमिनमाथिको मेट्रो रेल नबन्ने पक्का भएको बताए ।

'आवश्यक चौडाइ समेत उपलब्ध नहुँदा परियोजना अगाडि नबढ्ने निश्चित जस्तै भयो,' चित्रकारले लोकान्तरसँग भने, 'जमिनमुनिको मेट्रो रेलको सम्भावनाबारे अहिले निष्कर्ष निस्किएको छैन । तर, जमिनमाथिको मेट्रो रेलको सम्भावना काठमाडौं उपत्यकाभरमै लगभग छैन ।'

समयमा नै ठेक्का रद्द गर्नुपर्नेमा सो नगरी चिनियाँ परामर्शदातालाई रेल विभागले २०२१ मार्चदेखि अगस्टसम्मको पारिश्रमिक र शोधभर्नाबापत १ करोड ९ लाख १३ हजार रुपैयाँ भुक्तानी गरेको छ ।