लुम्बिनीका मुख्यमन्त्री चौधरी विश्वासको मत लिँदै

लुम्बिनी प्रदेशका मुख्यमन्त्री डिल्लीबहादुर चौधरीले मंगलवार विश्वासको मत लिँदैछन् ।

प्रदेशसभा भवनमा ११ बजे बस्ने बैठकमा चौधरीले विश्वासको मत लिन लागेका सरकारका प्रवक्ता सन्तोष पाण्डेले जानकारी दिए । 

नेकपा एमाले र राप्रपाबाहेक प्रदेशमा क्रियाशील अन्य सबै ८ दल तथा १ स्वतन्त्र सांसद समेत ५३ जना सांसदको समर्थनमा वैशाख १४ गते चौधरी मुख्यमन्त्रीमा नियुक्त भएका थिए । शपथ वैशाख १५ गते लिएका थिए ।
 
राष्ट्रपति निर्वाचनले केन्द्रमा फेरिएको राजनीतिक समीकरणअनुसार माओवादी सहितका ६ दलले तत्कालीन मुख्यमन्त्री लिला गिरीलाई दिएको समर्थन फिर्ता लिएसँगै विश्वासको मत पाउन नसकेपछि प्रदेश प्रमुख अमिक शेरचनले चौधरीलाई संविधानको धारा १६८(२) अनुसार मुख्यमन्त्री नियुक्त गरेका हुन् ।