एमाले सांसद कोइरीलाई निलम्बनको तयारी, प्रहरीको पत्र सभामुखकोमा

महोत्तरी– १ बाट निर्वाचित एमाले सांसद लक्ष्मी महतो कोइरीलाई निलम्बन गर्ने प्रक्रिया अगाडि बढेको छ ।

*प्रहरी महानिरीक्षक वसन्त कुँवरको सचिवालयमार्फत आएको पत्र सभामुख देवराज घिमिरेसमक्ष पुगेर निर्णय प्रक्रिया अगाडि बढेको हो ।

प्रहरीले संसद् सचिवालयलाई गत पुस ७ गते र यही वैशाख १७ गते कोइरीका सम्बन्धमा पत्र पठाएको थियो ।

संसद् सचिवालय स्रोतका अनुसार यसअघि आएको पत्र सभामुखकोमा पुगेको थिएन । 

यसबीचमा कोइरीले बिरामी बिदा स्वीकृतिका लागि माघ २५ गते संसद् सचिवालयमा पत्र दर्ता गराएका थिए ।

यो विषयले प्रतिनिधिसभा बैठकमा समेत चर्को विवाद र वादप्रतिवाद भएको थियो ।

प्रहरीबाट पत्र आएपछि कोइरीलाई निलम्बन गर्ने प्रक्रिया अगाडि बढेको संसद् सचिवालयका प्रवक्ता एकराम गिरीले लोकान्तरलाई जानकारी दिए ।

‘विधिअनुसार, कानूनअनुसार जे हुने हो, त्यो प्रक्रिया अगाडि बढिसकेको छ,’ गिरीले लोकान्तरसँग भने ।

मधेश आन्दोलनका क्रममा २०७२ भदौ २५ गते सशस्त्र प्रहरी बलका सहायक निरीक्षक थमन विकलाई घेरा हालेर कुटपिट गरी हत्या गरेको घटनामा महतोविरुद्ध जिल्ला अदालत महोत्तरीमा कर्तव्य ज्यान मुद्दा विचाराधीन छ ।

जिल्ला अदालतले थुनछेक बहसपछि महतोलाई १ लाख रुपैयाँ धरौटीमा छाड्ने आदेश दिएकोमा उच्च अदालत जनकपुरले थुनामा राख्न आदेश दिएको थियो । तर, कोइरी पक्राउ परेका छैनन् ।

फरार अभियुक्त रहेकै बेला चुनाव लडेर उनी निर्वाचित भएका थिए ।

संसद् सचिवालय स्रोतका अनुसार कोइरीलाई आजभोलिमै निलम्बन गर्ने गरी तयारी भएको छ । संसद् अधिवेशन नचलेको अवस्थामा सूचना प्रकाशित गरी निलम्बन गर्न सकिने व्यवस्था छ ।

* प्रहरीबाट आएको पत्र हुनुपर्नेमा अन्यथा भएकाले सच्याइएको छ ।