प्रतिनिधि सभामा नेकपा एमालेका सांसद टोपबहादुर रायमाझीविरुद्ध नक्कली शरणार्थी प्रकरणमा राज्य विरुद्धको कसूर लगायत संगठित अपराध गरेको आरोपपत्र दायर गरिएको छ ।

सरकारी वकिलको कार्यालयले काठमाडौं जिल्ला अदालतमा बुधवार आरोपपत्र दायर गरेको हो । 

पूर्व गृहमन्त्री बालकृष्ण खाँण, तत्कालीन गृहसचिव टेकनारायण पाण्डेलगायत ३० जनाविरुद्ध काठमाडौं जिल्ला अदालतमा मुद्दा दायर गरिएको छ । सबैलाई ठगी, राज्य विरुद्धको कसूर, सरकारी लिखत कीर्ते तथा संगठित अपराधको मुद्दा दायर गरिएको छ । 

रायमाझीका बाउछोराविरुद्ध नै मुद्दा दायर भएको छ । ‘... टोपबहादुर रायमाझीले शक्तिशाली र गरिमामय पदमा बसी आफूलाई लाभ पुर्‍याउने र अकूत सम्पत्ति कमाउने उद्देश्यले राष्ट्रहीत प्रतिकूल काम गरेको र निजहरूले गरेको उक्त कसूरले नेपालको स्वाभिमान तथा अन्तर्राष्ट्रिय छविमा आँच आएको र नेपाल र नेपालीलाई अन्तर्राष्ट्रिय जगतमा हेर्ने दृष्टिकोणमा समेत आँच आउने गरी राष्ट्रको साख गिराउने काम गरेकाले राज्य विरुद्धको कसूर गरेको पुष्टि हुन आयो,’ आरोप पत्रमा भनिएको छ । 

पक्राउ पूर्जी जारी भएपछि ११ दिन फरार रहेका रायमाझी वैशाख ३१ गते पक्राउ परेका थिए । बयानका क्रममा रायमाझीले आफ्नो छोराको खातामा पैसा आएको स्वीकारिसकेका छन् ।