स्वास्थ्य तथा जनसंख्या मन्त्रालयले गर्मी तथा बर्खायाम शुरू भएदेखि बालबालिकामा झाडापखाला र हैजाको जोखिम बढेको जनाएको छ ।

मन्त्रालयले सूचना जारी गरी गर्मी तथा बर्खायाम शुरू भएदेखि बालबालिकालाई झाडापखाला र हैजाबाट बचाउन अभिभावक सबैलाई आग्रह गरेको हो ।
 
मन्त्रालयले सधैं पानी उमालेर वा क्लोरिन झोल प्रयोग गरेर मात्र पिउन, व्यक्तिगत सरसफाइमा ध्यान दिन, बासी तथा सडेगलेका खानेकुरा नखान, काँचो खान मिल्ने फलफूल र तरकारीको सरसफाइमा विशेष ध्यान पुर्‍याउन आग्रह गरेको छ । 

खानालाई छोपेर राख्न र खुला रूपमा दिसापिसाब नगर्न, चर्पीको अनिवार्य प्रयोग गर्न र दिसापिसाब गरिसकेपछि साबुनपानीले हात धुन समेत आग्रह गरिएको छ । मन्त्रालयले बालबालिकालाई हैजा तथा झाडाझाडापखाला लागेमा घरमा नै उपचार गर्न समेत आग्रह गरेको छ । 

पखाला हुनासाथ १ लिटर सफा पानीमा १ पुरिया जीवनजल राखी राम्ररी घोलेर पटक–पटक खुवाउन आग्रह गरिएको छ । बालबालिकालाई प्रशस्त मात्रामा सफा तथा झोल खानेकुरा खुवाउन, नरम तथा पच्ने खानेकुरा खुवाउन, जिंक चक्कीको मात्रा नबिराईकन खुवाउन र सरसफाइमा ध्यान दिन अभिभावकलाई आग्रह गरिएको छ ।