नेकपा एकीकृत समाजवादीका अध्यक्ष माधवकुमार नेपालले आफूहरूको मोर्चाबाट परिवर्तनशील पक्ष तर्सिन नपर्ने बताएका छन् ।

४ दलको समाजवादी मोर्चा नेपाल गठनको घोषणा कार्यक्रममा नेपालले प्रतिगामी सोच भएका मात्रै आफूहरूको सहयात्राबाट तर्सिएको बताएका हुन् । 

‘कुनै पार्टीलाइ घुर्काउन, दबाब दिन र तर्साउन हामी मोर्चामा आवद्ध भएको होइन । कोही नतर्सिनुस्, ढुक्क हुनुहोस् । प्रगति र अग्रगमनको पक्षमा हुने तर्सिनुपर्दैन, नहुने तर्सिए हुन्छ,’ नेपालले भने, ‘परिवर्तनको विरोधमा कोही लाग्छन् भने हामी मुकाविला गर्छौं ।’

मुकाविला गर्न नभई सकारात्मक शक्तिलाई एकताबद्ध गर्न मोर्चा बनाएको उनले प्रस्ट्याए । सकारात्मक सोच राखेर समाजवादी शक्तिको जनतामा रहेको प्रभावलाई विस्तार गर्न, सुशासनलाई सृदृढ गर्न र राजनीतिका विकृति र विसंगतिविरुद्ध एकताबद्ध भएको उनको प्रस्टोक्ति छ । 

पहिले पनि वाममोर्चा बनाउँदा पञ्चायती र निंरकुश राजाशाही व्यवस्थालाई ध्वस्त बनाएको उनले बताए । ‘सत्तामा बस्ने पनि यही छन् । बाहिरका पनि यही छन् । यसको विशेषता र नयाँपन पनि यही हो । अरु समूह छुट्नुभएको छ, आउनुस्,’ नेपालले भने, ‘कतिलाई अझ हाम्रै पार्टीभित्र पनि विलय हुने हो कि भन्ने परेछ । हाम्रो पार्टीलाई कसैले निल्दैन । हातेमालो गर्दै अगाडि जान खोजेका हौं ।’

पहिलोपल्ट नभई दशकौंदेखिका सहयात्रीबीच आपसी विश्वासमा अघि बढेको भन्दै उनले ढुक्क हुन आग्रह गरे । यसअघि कम्युनिस्टले पाएको सफलतालाई जोगाउन नसक्दा अवसर खेर गएको पनि उनले बताए । 

‘एकतावद्ध हुँदा २०७४ सालमा अभूतपूर्व सफलता पाएका थियौं । त्यसलाई अवसरमा बदल्न सकेको भए । पार्टीलाई राम्रोसँग अगाडि बढाउने र सबैको क्षमतालाई अगाडि बढाउन सकेको भए २०७९ को परिणाम भिन्न हुन्थ्यो,’ नेपालले भने, ‘ढिलै भए पनि ठीक शिक्षा लिँदा राम्रो होला । गल्तीबाट शिक्षा लिइएन भने भीरबाट लड्नेलाई रामराम भन्न सकिन्छ, काँधा थाप्न सकिँदैन ।’