नेपाल भ्रमणमा रहेका संयुक्त राष्ट्रसंघका महासचिव एन्टोनियो गुटेरेस मंगलवार बिहान बुद्ध जन्मस्थल लुम्बिनी आइपुगेका छन् । पूर्वनिर्धारित कार्यतालिकाभन्दा दुई घण्टा ढिला गरी महासचिव गुटेरेस लुम्बिनी आइपुगेका हुन् । 

महासचिव गुटेरेसलाई लुम्बिनीमा प्रधानमन्त्री पुष्पकमल दाहाल ‘प्रचण्ड’ ले स्वागत गरे । महासचिवभन्दा केही घण्टाअघि मात्रै प्रधानमन्त्री लुम्बिनी आइपुगेका थिए ।

दाहालसँगै गुटेरेसलाई लुम्बिनीमा संस्कृति पर्यटन तथा नागरिक उडड्यन मन्त्री सुदन किराँती, लुम्बिनी प्रदेशका मुख्यमन्त्री डिल्लीबहादुर चौधरी, लुम्बिनी विकास कोषका उपाध्यक्ष डा.ल्हारक्याल लामा, रुपन्देहीका प्रमुख जिल्ला अधिकारी (सीडीओ) गणेश अर्याललगायतले स्वागत गरेका थिए । महासचिव गुटेरेस विशेष विमानमार्फत् भैरहवास्थित गौतमबुद्ध अन्तर्राष्ट्रिय विमानस्थल हुँदै लुम्बिनी आइपुगेका हुन् । 

भैरहवा विमानस्थलबाट उनी सिधै हेलिकप्टरमार्फत् लुम्बिनी पुगेका थिए । एन्टोनियोले लुम्बिनीमा डेढ घण्टा बिताउनेछन् । सन् १९६७ मा संयुक्त राष्ट्र संघका महासचिव ऊ थान्त लुम्बिनी भ्रमणमा आएका थिए । 

त्यसपछि नै लुम्बिनीको विश्वभर प्रचार–प्रसार भएको थियो । अहिले गुटेरेसको भ्रमणले लुम्बिनीको विकास र पर्यटन क्षेत्रमा ठूला आशा पलाएको विकास कोषका कोषाध्यक्ष ढुण्डीराज भट्टराईले बताए ।

बुद्ध जन्मस्थल लुम्बिनी मात्रै नभएर रामग्राम र कपिलवस्तुको विकासमा पनि योजना बनाएर अघि बढ्ने र लुम्बिनीलाई विश्व शान्ति शहरको रूपमा विकास गर्ने अवधारणा रहेको छ ।

महासचिव गुटेरेसको भ्रमणले लुम्बिनी र गौतमबुद्धको शान्तिको सन्देश विश्वभर थप प्रचारप्रसार हुने र लुम्बिनी क्षेत्रको पर्यटन प्रवर्द्धनमा मद्दत पुग्ने अपेक्षा गरिएको छ ।

महासचिवको भ्रमणलाई लिएर लुम्बिनी वरपर सुरक्षा व्यवस्था कडा पारिनुका साथै बुद्ध जन्मस्थललाई झकिझकाउ बनाइएको छ । लुम्बिनीबाट विश्व शान्तिको अपिल पनि गरिँदै छ ।