कपिलवस्तुको शुद्धोधन गाउँपालिकाका उपाध्यक्ष होमप्रकाश चौधरी (कुर्मी)ले प्रमुख प्रशासकीय अधिकृत कृष्णप्रसाद ज्ञवालीलाई कुटपिट गरेका छन् ।

बिहीवार दिउँसो आफ्नो कार्यकक्षमा प्रवेश गरी उपाध्यक्ष कुर्मीले हातपात गरी गालीगलौज गरेका प्रमुख प्रशासकीय अधिकृत ज्ञवालीले बताएका छन् ।

वादविवादका क्रममा ज्ञवालीको ‘नेम प्लेट’ र उनको कार्यकक्षमा रहेको टेबुलको सिसा पनि फुटेको छ ।

‘मेरो कार्यकक्षमा आएर गाडी चाहियो भनेर उनका चालकले भनेका थिए’ ज्ञवालीले लोकान्तरसँग भने, ‘शुरूमा जेनेरेटर अफ गरेछन् । सीसीटीभी अफ गरेर मेरो कार्यकक्षमा आएका रहेछन् । भित्र छिरेर शुरूमै मेरो टाउकोमा दुई बक्सिङ हाने । टेबलमाथिको सिसा फुटाएर हान्न खोज्दा साथीहरूले जगाए ।’

उपाध्यक्ष कार्यकक्षबाट निस्केर बाहिर १० मिनेट गाली गरेर निस्केका ज्ञवालीले बताए ।

गाउँपालिका अध्यक्ष कमलेशशरण चौधरीको अध्यक्षतामा बैठक बसेर उपाध्यक्षलाई पक्राउ गरी कारवाही गर्न माग गरेका छन् । उनलाई कारवाही नगरेसम्म गाउँपालिका र वडा कार्यालयको सबै काम ठप्प पार्ने निर्णय पनि गरेका छन् ।

त्यस्तै अध्यक्ष चौधरी र अधिकृत ज्ञवाली लगायतका कर्मचारीले प्रमुख जिल्ला अधिकारी शंकरहरि आचार्य भेटेर ज्ञापनपत्र दिई कडा कारवाहीको माग गरेका छन् ।

तर उपाध्यक्ष कुर्मीले आफूले हात छाडेको गाली मात्रै गरेको दावी गरेका छन् । ‘हाकिमले सरकारी गाडी दुरुपयोग गरेका छन्’ कुर्मीले भने, ‘हाकिम सरकारी क्वार्टरमा बस्दैनन् । गाडी लिएर गुल्मी जान्छन् । मैले सरकारी गाडी लिएको छैन । एक दिन गाडी माग्दा निर्णय माग्ने ?’ उनले थपे, ‘आफ्नो अधिकारले पाएका विषयवस्तुमा तोकआदेश गर्दा बेवास्ता गर्दै फर्काउने गरेको र काम विशेष कार्यालयको गाडी माग्दा नदिएकाले विवाद भए हो ।’ 

अनुगमनको विषयमा पनि हाकिम र अध्यक्षले आफूलाई एक्लै पार्दै आएको उनको भनाइ छ ।

उपाध्यक्ष कुर्मी नेकपा माओवादी केन्द्रबाट निर्वाचित भएका हुन् भने, अध्यक्ष कमलेश लोकतन्त्रिक समाजवादी पार्टी (लोसपा)बाट निर्वाचित हुन् । पालिकामा विवाद हुँदा यस अघि पनि समयमै बजेट आउन सकेको थिएन ।