उच्च अदालत पाटनले नक्कली भुटानी शरणार्थी प्रकरणमा नेकपा एमालेका सांसद टोपबहादुर रायमाझीलाई थुनामै राख्न आदेश दिएको छ ।

साथै उच्चले उनका छोरा सन्दीप रायमाझीलाई धरौटीमा रिहा गर्न आदेश दिएको छ । ​

न्यायाधीशद्वय जनक पाण्डे र प्रकाश खरेलको संयुक्त इजलासले शुक्रवार काठमाडौं जिल्ला अदालतको असार १ गतेको आदेश सदर गर्दै टोपबहादुरलाई थुनामै राख्न आदेश गरेको हो ।

प्रत्यक्ष संलग्नता नदेखिएको भन्दै छोरा सन्दीपलाई ३० लाख धरौटी बुझाएर रिहा गर्न आदेश दिएको हो । 

नेपाली कांग्रेसका नेता एवं पूर्व गृहमन्त्री बालकृष्ण खाँण सम्बन्धमा भने न्यायाधीशहरूको मत बाझिएको छ ।

न्यायाधीश पाण्डेले ३० लाख धरौटी लिएर रिहा गर्ने राय दिएका छन भने खरेलले थुनामै राख्ने राय दिएका छन् । यो मुद्दा अब तेस्रो न्यायाधीशकोमा जाने आदेश भएको छ ।