लुम्बिनीमा भएको नि:शुल्क आँखा शिविरबाट ३ हजार ७५५ जना सर्वसाधरणले लाभ लिएका छन् । मंसिर १८ देखि २२ गतेसम्म सञ्चालन गरिएको शिविरमा चेकजाँच गराएकामध्ये ९०९ जना मोतियाविन्दुका विरामीको शल्यक्रिया गरिएको राजकीय थाई विहारले जनाएको छ । 

विहारका प्रमुख भिक्षु सुफोतले बुद्धजन्मस्थल वरपरका मानिसहरूलाई सेवा दिने उद्देश्यले १४ औं संस्करणका रुपमा निशुल्क आँखा शिविर गरिएको बताए । 

तिलगंगा आँखा अस्पताल, काठमाडौंका वरिष्ठ नेत्ररोग विशेषज्ञ डा सन्दुक रुइत, थाइल्याण्डका नेत्ररोग विशेषज्ञ डा अनुचित पोनाथ्याङ, डा नवत वातानाची, डा स्वात कौशाकुलसहितको स्वास्थ्यकर्मीको टोली आँखा शिविरमा खटिएका थिए । 

बुद्धजन्मस्थल लुम्बिनीमा विगतदेखि नै तिलगंगा आँखा अस्पतालले राजकीय थाई विहार लुम्बिनीसँग समन्वय र सहकार्य गर्दै आँखा शिविर गर्दै आएको अस्पतालका बाह्य कार्यक्रम अधिकृत नामखेन लामाले जानकारी दिए । उनले बुद्धजन्मस्थल वरपरका सर्वसाधरण स्वास्थ्य पहुँचबाट टाढा रहेकाले निःशुल्क आँखा शिविर गर्ने गरिएको बताए । 

सर्वसाधारणमा आँखाका सम्बन्धमा हेलचेक्र्याइँ र आर्थिक अवस्थासमेत कमजोर हुने भएकाले आँखा शिविर गर्ने गरिएको थाई विहार लुम्बिनीका प्रमुख भिक्षु सुफोतले बताए । विहारले बुद्ध र यससँग जोडिएका क्षेत्रका नागरिकहरूलाई प्रत्यक्ष फाइदा पुग्ने क्षेत्रमा सक्दो सामाजिक कार्य गर्दैआएको छ । 

यसअघि विहारले आधुनिक प्रविधिबाट घुँडा प्रत्यारोपण, भूकम्पप्रभावितहरूलाई सहयोगजस्ता सामाजिक कार्य गर्दैआएको छ ।