अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले भ्रष्टाचारविरुद्धको लडाइमा धेरै संरचनात्मक चुनौतीहरूको सामना गर्नुपरेको बताएका छन् ।

अमेरिकाको एटलान्टा शहरमा आयोजित भ्रष्टाचार विरुद्धको संयुक्त राष्ट्रसङ्घीय महासन्धि पक्ष राष्ट्रहरूको दशौं सम्मेलनलाई सम्बोधन गर्दै प्रमुख आयुक्त राईले भ्रष्टाचार नियन्त्रणको क्षेत्रमा सुधार भए पनि नेपालले धेरै चुनौतीको सामना गर्नुपरेको बताए ।

यही मंसिर २५ देखि २९ गते सम्म चलेको भ्रष्टाचारविरुद्धको संयुक्त राष्ट्रसंङ्घीय महासन्धिका पक्ष राष्ट्रहरूको सम्मेलनमा राई नेपालको प्रतिनिधि मण्डल प्रमुखको हैसियतमा सहभागी भएका थिए । 

विभिन्न संरचनामा भ्रष्टाचार गहिरोसँग गाडिएको भन्दै नियन्त्रणका लागि अन्तर्निहित कारकहरूलाई सम्बोधन गर्न आवश्यक रहेको उनको भनाइ छ । 

​अधिक चुनौतीबीच संवैधानिक दायित्व र कार्यादेश कार्यान्वयन गर्न आयोग प्रतिबद्ध रहेको उनले बताए ।

सम्बोधनका क्रममा उनले नेपाल भ्रष्टाचार नियन्त्रणको लागि दृढ संङ्कल्पित रहेको बताए । भ्रष्टाचारविरुद्धको संयुक्त राष्ट्रसंङ्घीय महासन्धिका प्रावधानहरू कार्यान्वयन गर्न नेपालले महत्त्वपूर्ण विधायिकी र संस्थागत कदमहरू चालेको उनले बताए । 

‘नेपाल भ्रष्टाचार नियन्त्रणको लागि दृढसंङ्कल्पित छ । र, यसविरुद्ध शून्य सहनशिलताको नीति अवलम्बन गर्दै नियन्त्रणको लागि प्रवर्द्धनात्मक एवं दण्डात्मक उपायहरू अवलम्बन गरेको छ,’ उनले भने । 

महासन्धिका प्रावधानहरू कार्यान्वयनका लागि राष्ट्रिय रणनीति तथा कार्ययोजना तयार गरिएको राईले सम्मेलनमा जानकारी गराए ।

आयोगको प्रयासले भ्रष्टाचार नियन्त्रणमा उल्लेखनीय प्रगति गरेको समेत उनले बताए ।

भ्रष्टाचार विरुद्धको संयुक्त राष्ट्रसंङ्घीय महासन्धिको प्रभावकारी कार्यान्वयनको लागि कानून कार्यान्वयन र न्यायिक सहयोगलाई बलियो बनाउन राज्यहरूबीच आपसी सहयोग संयन्त्र स्थापना गर्न प्रयासरत रहेको कुरासमेत उनले  बताए ।

‘भ्रष्टाचारविरुद्ध संयुक्त राष्ट्रसंङ्घीय महासन्धिको कार्यान्वयन गर्न र यसका उद्देश्यहरू प्राप्त गर्न नेपालले आगामी दिनमा समेत पक्ष राष्ट्रहरूसँगको सहयोगी प्रयासहरूको उत्सुकतापूर्वक अपेक्षा गर्दछ’, राईले भने ।