एमालेलाई समेट्ने 'च्याप्टर क्लोज'

सत्ता गठबन्धनले राष्ट्रिय सभा निर्वाचनमा नेकपा एमालेलाई नसमेट्ने भएको छ । शनिबार  बिहान बालुवाटारमा बसेको गठबन्धन दलहरूको बैठकले एमालेलाई नसमेटेरै अगाडि बढ्ने सहमति गरेको हो । 

एमालेले नमिल्नेगरी सिट मागेको र संसदीय समितिमा प्रभावकारी सहयोग नगरेको भन्दै राष्ट्रिय सभामा गठबन्धन दलबीच मात्रै भागबन्डा गर्ने सहमति भएको बैठकमा सहभागी एक नेताले बताए । ‘एमालेले नमिल्नेबारे गरी सिट मागेपछि मिलेर जाने सम्भावना लगभग सकियो । उहाँहरूले ६/७ सिट माग्नुभयो तर, गठबन्धनले दिने भनेको ३/४ सम्म सहमति जनाउनुभएन,’ कांग्रेस सभापति शेरबहादुर देउवा निकट स्रोतले लोकान्तरसँग भन्यो, ‘यसैले बालुवाटारमा बसेको बैठकले १९ सिटमा सत्ता गठबन्धन दलबीच मात्रै भागबन्डा गर्ने सहमति गरेको छ । अब एमालेलाई भागबण्डा दिने च्याप्टर लगभग बन्द भयो ।’

अब सत्ता गठबन्धन दलबीच मात्रै १९ सिट भागबन्डा गर्ने गरी पुनः छलफल गर्ने तयारी रहेको कांग्रेस नेता रमेश लेखकले जानकारी दिए ।